வருணை பிரசாரத்திற்கு அழைக்க டெல்லி பாஜக பீதி

டெல்லி: இஸ்லாமியர்கள் குறித்து துவேஷமாக பேசி சிக்கலில் மாட்டிக் கொண்ட வருண் காந்தியை டெல்லிக்குப் பிரசாரத்திற்கு அழைக்க டெல்லி பிரதேச பாஜக விரும்பவில்லையாம். இதனால் வருண் காந்தி டெல்லியில் பிரசாரம் செய்ய மாட்டார்.

இதுகுறித்து டெல்லி மாநில பாஜக மூத்த தலைவர் ஒருவர் கூறுகையில், வருண் காந்தி டெல்லியில் பிரசாரம் செய்ய மாட்டார். அவர் பிரசாரம் செய்ய வேண்டும் என கட்சியினரிடமிருந்து கோரிக்கை எதுவும் வரவில்லை.

டெல்லியில் உள்ள ஏழு தொகுதிகளைச் சேர்ந்த கட்சியினர் மத்தியில் வருண் வர வேண்டும் என்ற எண்ணம் இல்லை என்றார்.

ஆனால் டெல்லி இஸ்லாமியர்களின் ஓட்டு வங்கியில் எங்கே ஓட்டை விழுந்து விடுமோ என்ற பயத்தில்தான் வருண் காந்தியை கூப்பிடுவதை டெல்லி பாஜக தவிர்ப்பதாக கூறப்படுகிறது.