தங்கம் விலை ஒரே நாளில் பவுனுக்கு ரூ.200 குறைந்தது!
அட்சய திரிதியை நாளில் தங்கம் வாங்கினால், வீட்டில் செல்வம் குவியும் என்ற நம்பிக்கையில் ஏராளமானோர் தங்கத்தை வாங்கினர். இதனால் அன்று சென்னையில் மட்டும் 1000 கிலோ தங்கம் விற்றுத் தீர்ந்தது. இதனால் அன்று மட்டும் தங்கம் விலை உயர்ந்தது.
ஆனால் அதன் பிறகு மீண்டும் தங்கத்தின் விலை குறையத் துவங்கிவிட்டது. ஏப்ரல் 28-ம் தேதி ஒரு பவுன் தங்கம் ரூ.11,024-க்கு விற்பனை ஆனது. நேற்று ஒரு பவுன் தங்கம் ரூ.10,824 ஆக குறைந்தது. அதாவது நேற்று ஒரே நாளில் பவுனுக்கு ரூ.200 குறைந்துள்ளது
அட்சய திரிதியைக்குப் பிறகு தங்கத்தின் தேவை குறைந்ததாலும், அமெரிக்க டாலரின் மதிப்பும் குறைந்து வருவதாலும் தங்கம் விலை குறையத் துவங்கிவிட்டதாக சென்னை நகைக்கடை உரிமையாளர்கள் கருத்து தெரிவித்துள்ளனர்.
தங்கம் விலை வீழ்ச்சியடைந்த நேற்று, இந்திய பங்குச் சந்தை 401 புள்ளிகள் வரை உயர்ந்து நல்ல லாபம் சம்பாதித்தது குறிப்பிடத்தக்கது.