தம்பி மிரட்டாதே...எஸ்.வி.சேகர் மீது விசு தாக்கு

சென்னை: அதிமுகவை மிரட்டி பார்க்க வேண்டாம் என அக் கட்சியின் அதிருப்தி எம்எல்ஏ எஸ்.வி.சேகருக்கு இயக்குனர் விசு கண்டனம் தெரிவித்துள்ளார்.

தென் சென்னை தொகுதி அதிமுக வேட்பாளர் சிட்லபாக்கம் ராஜேந்திரனை ஆதரித்து நடிகர் விசு பிரசாரம் செய்தார்.

மையிலாப்பூர் மாங்கொல்லையில் நடந்த பிரசாரப் பொதுக்கூட்டத்தில் விசு பேசுகையில்,

இந்தத் தொகுதியின் எம்எல்ஏவாக இருக்கும் எஸ்.வி. சேகரை எனக்கு நீண்ட நாட்களாகத் தெரியும், அவர் கதாநாயகனாவதற்கு நான்தான் காரணம்.

வெறும் நடிகராக இருந்த வரை அதிமுக சார்பில் போட்டியிட வைத்தவர் புரட்சித் தலைவி. வெல்ல வைத்து எம்எல்ஏ ஆக்கியது அம்மா தான். இரட்டை இலை சின்னத்தில் ஜெயித்தவர் கண்ட கண்ட இடத்துக்கு செல்வது கண்டனத்துக்குரியது.

அவருக்கு ஒன்றை சொல்கிறேன். அதிமுகவை மிரட்டி பார்ப்பது சரியல்ல. நாடும், மக்களும் நன்றாக இருக்க இரட்டை இலைக்கு வாக்களியுங்கள் என்றார்.