அணு ஆயுதங்கள் தலிபான் கைக்கு போகாது: சர்தாரி

வாஷிங்டன்: பாகிஸ்தான் அணு ஆயுதங்கள் பத்திரமாக, பாதுகாப்பாக உள்ளன. அவற்றை தலிபான்கள் கைப்பற்றி விடக் கூடும் என்ற அச்சம் தேவையில்லை. பாகிஸ்தான் ராணுவம் பலம் வாய்ந்தது. அதை மீறி தலிபான்களால் அணு ஆயுதங்களைக் கைப்பற்ற முடியாது என அதிபர் ஆசிப் அலி சர்தாரி கூறியுள்ளார்.

இதுகுறித்து சிஎன்என் தொலைக்காட்சிக்கு அவர் அளித்த பேட்டியில், பாகிஸ்தான் நாட்டின் அணு ஆயுதங்கள் பத்திரமாக உள்ளன.

தலிபான்களின் கைக்கு பாகிஸ்தான் விழுந்து விடுமோ என்ற பயமோ, அணு ஆயுதங்களை அவர்கள் கைப்பற்றி விடுவார்களோ என்ற அச்சமோ தேவையில்லை.

7 லட்சம் வீரர்களைக் கொண்ட ராணுவத்தை நாங்கள் வைத்துள்ளோம். அப்படி இருக்கையில் எப்படி எங்களை தலிபான்கள் கைப்பற்ற முடியும்?

பாகிஸ்தான் ராணுவத்திற்குள் இருக்கும் தலிபான் ஆதரவாளர்கள் அணு ஆயுதங்களை அவர்களிடம் கொடுத்து விடலாம் என்ற அமெரிக்காவின் அச்சமும் தேவையற்றது.

பாகிஸ்தான் ராணுவத்தில் தலிபான் ஆதரவாளர்கள் என்று யாருமே கிடையாது. ஒரே கடவுள், ஒரே மதம் என்ற அடிப்படையில் இந்த சந்தேகம் வரலாம். ஆனால் அது தேவையில்லை.

பாகிஸ்தானின் அணு ஆயுதங்கள், எங்கே அவை உள்ளன என்று அமெரிக்கா கேட்டால் அதை எங்களால் தெரிவி்க்க முடியாது. நான் தெரிவிக்க மாட்டேன் என்றார் சர்தாரி.