தொண்டர்கள் கடுப்பு-கார்த்திக் கட்சி கொடி கம்பம் சாய்ப்பு

விருதுநகர்: நாடாளும் மக்கள் கட்சி தலைவரும், நடிகருமான கார்த்திக்கை கண்டித்து அவரது கட்சித் தொண்டர்களே கட்சியின் கொடிக் கம்பத்தை வெட்டி சாய்த்தனர்.

விருதுநகர் தொகுதியில் பாஜக கூட்டணி சார்பில் கார்த்திக் போட்டியிடுகிறார். அவருக்கு ஆதரவாக சமத்துவ மக்கள் கட்சி தலைவர் நடிகர் சரத்குமாருடன் அருப்புக் கோட்டை பகுதியில் வேனில் சென்று பிரச்சாரம் செய்தார்.

அப்போது, அருப்புக்கோட்டை ராமசாமிபுரம் பகுதியில் கூடியிருந்த தொண்டர்கள் அவரை ராமசாமியாபுரம் அருகே உள்ள மற்றொரு பகுதிக்கு பிரச்சாரம் செய்ய வருமாறு அழைத்தனர்.

இதற்கு மறுப்பு தெரிவித்த நடிகர் கார்த்திக் அருகில் உள்ள ஒரு ஊரில் பொதுக் கூட்டம் நடப்பதால் வர இயலாது என்றார்.

இதனால் ஆவேசம் அடைந்த அவரது கட்சியினர் ராமசாமிபுரத்தில் இருந்த 20 அடி உயர நாடாளும் மக்கள் கட்சி கொடிக்கம்பத்தை வெட்டிச் சாய்த்தனர்.

தகவல் அறிந்த போலீசார் அங்கு விரைந்து சென்று அவரது கட்சி தொண்டர்களை அமைதிப்படுத்தினர். இதனையடுத்து அவர்கள் கலைந்து சென்றனர்.