குறைந்த கட்டண விமானசேவை தொடங்கியது ஜெட்

ஜெட் ஏர்வேஸ் எகானமி கனெக்ட் எனும் பெயரில் குறைந்த கட்டண விமான சேவையைத் துவங்கியுள்ளது ஜெட் ஏர்வேஸ் நிறுவனம்.

இந்தியாவின் குறிப்பிட்ட வழித்தடங்களில் மட்டும் இந்த விமானங்கள் இயக்கப்படும். குறைந்த கட்டணத்தில் பயணம் செய்ய வேண்டும் என்ற விருப்பம் கொண்ட பயணிகளைக் கருத்தில் கொண்டு இந்த விமான சேவையைத் துவக்கியுள்ளது ஜெட்.

இதற்கென தனி விமானங்களை இயக்குகிறது இந்நிறுவனம். இப்போது நாட்டின் அனைத்து தரப்பு மக்களையும் கவரும் வகையில் ஜெட் நிறுவனம் விரிவாக்கப்பட்டுள்ளது.

'அதிக கட்டணத்தில் சகல வசதிகளைக் கொண்ட விமானங்களும் உள்ளன, குறைந்த கட்டணத்தில் வசதிகள் சற்று குறைவான விமானங்களும் இயக்கப்படுகின்றன' என தனது அறிக்கையில் தெரிவித்துள்ளது ஜெட்.

ஜெட் ஏர்வேஸ் கனெக்டில் இப்போதைக்கு இரு 737 ரக விமானங்களும், 6 ஏடிஆர் ரக விமானங்களும் இயக்கப்படும்.

சென்னை- கோவை, சென்னை- மதுரை, சென்னை- கொச்சி, மும்பை- அகமதாபாத், மும்பை- போபால், மும்பை- உதய்ப்பூர், பெங்களூர்- புனே மற்றும் பெங்களூர்- மங்களூர் மார்க்கங்களில் இவை இயக்கப்படும்.