அமைச்சரவைக் கூட்டம்-திமுக புறக்கணிப்பு

டெல்லி: டெல்லியில் பிரதமர் மன்மோகன் சிங் கூட்டிய கடைசி அமைச்சரவைக் கூட்டத்தை திமுக மற்றும் சரத்பவாரின் தேசியவாத காங்கிரஸ் ஆகியவை புறக்கணித்துவிட்டன.

திமுக-காங்கிரஸ் இடையிலான உறவு சீர்குலைந்து வரும் நிலையில் கூட்டத்தை திமுக புறக்கணித்தது முக்கியத்துவம் பெறுகிறது.

அதே போல பிகார் முதல்வர் நிதிஷ்குமாரை காங்கிரஸ் பொதுச் செயலாளர் ராகுல் காந்தி பாராட்டியதாலும், குமாருடன் கூட்டணிக்கு காங்கிரஸ் முயல்வதாலும் கடுப்பாகியுள்ள ரயில்வே அமைச்சர் லாலும் கூட்டத்தை புறக்கணி்த்தார். ஆனாலும் தனது கட்சியைச் சேர்ந்த அமைச்சர் ரகுவன்ஸ் பிரசாதை கலந்து கொள்ளச் செய்தார்.

அதே நேரத்தில் பிரச்சாரப் பணிகள் இருப்பதாகக் கூறி ராம் விலாஸ் பாஸ்வானும் கூட்டத்தை புறக்கணித்துவிட்டார். ஆனாலும் தான் ஐக்கிய முற்போக்குக் கூட்டணியிலேயே இருப்பதாக அறிவித்துள்ளார்.

திமுக சார்பில் பிரதமருக்கு அனுப்பப்பட்ட விளக்கத்தில், தேர்தல் பிரச்சாரத்தில் அமைச்சர்கள் உள்ளதால் வர முடியாது என்று கூறப்பட்டுள்ளது. பெயருக்காவது ஒரு அமைச்சரை திமுக அனுப்பியிருக்க முடியும் என்றாலும் ஜெயலலிதாவுடன் கூட்டணிக்கு காங்கிரஸ் தயாராகி வருவதால் தனது எதிர்ப்பை பதிவு செய்யும் வகையில் கூட்டத்தை அந்தக் கட்சி புறக்கணித்ததாகத் தெரிகிறது.