வாக்குச்சாவடி தெரியலையா...எஸ்எம்எஸ் பண்ணுங்க

சென்னை: சென்னையில் இருக்கும் மூன்று தொகுதிகளை சேர்ந்த வாக்காளர்கள் தாங்கள் ஓட்டு போடு்ம் வாக்குச்சாவடி எது என்பதை அறிந்து கொள்ள எஸ்எம்எஸ் சேவை துவக்கப்பட்டுள்ளது.

தமிழகத்தில் தொகுதி மறுசீரமைப்பு காரணமாக 13 தொகுதிகள் பெயர் மாற்றம் செய்யப்பட்டுள்ளது. மேலும் கடந்த முறை ஒரு தொகுதியில் இருந்த சில சட்டசபை தொகுதிகள் தற்போது வேறு இடத்துக்கு மாற்றப்பட்டுள்ளது.

இதனால் சில இடங்களில் மக்கள் தாங்கள் எந்த தொகுதியில் ஓட்டு போட வேண்டும், அதற்கான வாக்குச்சாவடி எங்கு இருக்கிறது போன்ற தகவல்கள் கிடைக்காமல் குழப்பத்தில் இருக்கின்றனர்.

இதன் காரணமாக சமீபத்தில் ஐதராபாத் மற்றும் பெங்களூர் ஆகிய நகரங்களில் வாக்குபதிவின் போது வாக்காளர்கள் எஸ்எம்எஸ் மூலம் தங்களது வாக்குச்சாவடியை அறிந்து கொள்ளும் முறை அறிமுகப்படுத்தப்பட்டது.

தற்போது இந்த புதிய வசதி தமிழகத்தில் சென்னையில் உள்ள மூன்று வட சென்னை, மத்திய சென்னை மற்றும் தென் சென்னை தொகுதி வாக்காளர்களுக்கும் கிடைக்க இருக்கிறது.

இந்த வசதியை பயன்படுத்த நினைப்பவர்கள் BOOTH என ஆங்கிலத்தில் டைப் செய்து, அதன் அருகில் உங்களது வாக்காளர் அடையாள அட்டையில் குறிப்பிடப்பட்டிருக்கும் எண்ணை டைப் செய்யவும், பின்னர் அதை 575758 என்ற எண்ணுக்கு எஸ்எம்எஸ் செய்யவும்.

இதையடுத்து உங்களுக்கு மறுமுனையில் இருந்து பதிலுக்கு எஸ்எம்எஸ் வரும். அதில் நீங்கள் எந்த வாக்குச்சாவடியில் வாக்களிக்க வேண்டும் என குறிப்பிடப்பட்டிருக்கும். ஒரு வேளை உங்களது பெயர் தேர்தல் ஆணையத்தின் வாக்காளர் பட்டியலில் இல்லை என்றால் அது குறித்து உங்களுக்கு எச்சரிக்கை அளிக்கப்படும்.

இந்த இலவச சேவையை தென் சென்னையை சேர்ந்த கிழக்கு பதிப்பகம் என்ற நிறுவனம் செய்து தருகிறது.