நாற்பது இடங்களிலும் வெல்வோம்-கருணாநிதி

சென்னை: தமிழகத்திலும் புதுவையிலும் 40 தொகுதிகளிலும் திமுக-காங்கிரஸ் கூட்டணி வெல்லும் என்று முதல்வர் கருணாநிதி கூறினார்.

கோபாலபுரத்தில் உள்ள ஒரு பள்ளியில் வாக்களித்த பின் நிருபர்களிடம் பேசிய அவர்,

மத்தியில் மீண்டும் காங்கிரஸ் கூட்டணி அரசு ஆட்சியமைக்கும். தமிழகத்திலும் புதுவையிலும் 40 இடங்களிலும் திமுக-காங்கிரஸ் கூட்டணியே வெல்லும்.

எதிர்க் கட்சிக் கூட்டணியில் நிறைய கட்சிகள் இருக்கலாம். ஆனால், கடந்த 5 ஆண்டுகளில் மத்திய அரசு செய்த பணிகள், 3 ஆண்டுகள் திமுக அரசு மாநிலத்தில் செய்த சாதனைகள் ஆகியவை அந்தக் கூட்டணியை விட பலமானது என்றார் கருணாநிதி.

2004ப் போல வெல்வோம்-தயாநிதி...

இந்நிலையில் திமுக மத்திய சென்னை வேட்பாளர் தயாநிதி மாறன் ஆங்கில டிவி ஒன்றுக்கு அளித்த பேட்டியில்,

ஐக்கிய முற்போக்கு கூட்டணியுடன், திமுகவுக்கு வலுவான நட்பு இருக்கிறது. நாடாளுமன்ற தேர்தலில் திமுக கூட்டணிக்கு எதிராக பிரச்சாரம் செய்ய எதிர்கட்சிகளுக்கு வேறு எதுவும் கிடைக்கவில்லை. இதனால் தான் அவர்கள் இலங்கை விவகாரத்தை மீண்டும் மீண்டும் பேசி வருகின்றனர்.

2004ம் ஆண்டில் வென்றதைப் போல 40 இடங்களிலும் திமுக கூட்டணி வெல்லும். ஜெயலலிதா வெல்லப் போவதாக நினைத்துக் கொண்டிருப்பவர்களுக்கு 16ம் தேதிக்குப் பின் நெஞ்சு வலி வரப் போவது நிச்சயம் என்றார்.