வி.சிக்கு அங்கீகாரம் கிடைத்ததும் திருமணம்-திருமா

சிதம்பரம்: விடுதலை சிறுத்தைகள் கட்சிக்கு உரிய அங்கீகாரம் கிடைத்ததும் திருமணம் செய்ய திட்டமிட்டுள்ளதாக அக்கட்சியின் தலைவர் திருமாவளவன் தெரிவித்துள்ளார்.

சிதம்பரம் மக்களவை தொகுதியில் விடுதலை சிறுத்தைகள் கட்சி சார்பில் அதன் தலைவர் திருமாமாவளவன் போட்டியிடுகிறார். இவரை எதிர்த்து பாமக சார்பில் முன்னாள் அமைச்சர் பொன்னுசாமி களமிறக்கப்பட்டுள்ளார்.

இந்த நிலையில், தனது திருமணம் குறித்து விடுதலை சிறுத்தைகள் கட்சி தலைவர் திருமாவளவன் நிருபர்களிடம் கூறுகையில்,

2004ம் ஆண்டு தேர்தலில் வெற்றி பெற்றதும் திருமணம் செய்து கொள்வதாக இருந்தேன். அப்போது அந்த வாய்ப்பு கிடைக்காததால் கட்சி பணிகளில் தீவிரம் காட்டினேன். அதனால் திருமணம் தள்ளிப்போனது. தமிழக முதல்வர் கருணாநிதியும், எனது பெற்றோர்களும், என்னை திருமணம் செய்து கொள்ள வலியுறுத்தி வருகின்றனர்.

இந்த தேர்தலில் கட்சிக்கு தேர்தல் ஆணையத்தின் அங்கீகாரம் கிடைத்ததும் திருமணம் செய்வேன் என்று நான் என் அம்மாவிடம் வாக்குறுதி கொடுத்தேன். அதன்படி விடுதலை சிறுத்தைகள் கட்சிக்கு உரிய அங்கீகாரம் கிடைத்ததும் திருமணம் செய்ய திட்டமிட்டுள்ளேன் என்றார்.