எங்களுக்கு 217..பாஜக வெளியிட்ட 'எக்ஸிட் போல்'!

டெல்லி: நடந்து முடிந்த தேர்தலில் காங்கிரஸ் கூட்டணிக்கு கூடுதல் இடங்கள் கிடைக்கும் என்று வந்துள்ள கருத்துக் கணிப்புகள், 'எக்ஸிட் போல்களை' பாஜக நிராகரித்துள்ளது.

பல்வேறு தொலைக்காட்சிகள், பத்திரிக்கள் வெளியிட்டுள்ள கணிப்புகளில் காங்கிரஸ் கூட்டணிக்கு 185 முதல் 205 இடங்களும், பாஜக கூட்டணிக்கு 165 முதல் 185 இடங்களும், மூன்றாவது அணிக்கு 110 முதல் 130 இடங்கள் கிடைக்கும் என்றும் கூறப்பட்டுள்ளது.

ஆனால், இந்தக் கருத்து கணிப்புகள் தவறானவை என்று கூறியுள்ள பாஜக, தாங்களே ஒரு 'எக்ஸிட் போல்' நடத்தியதாகவும், அதன் அடிப்படையில் தங்களுக்கே அதிக இடங்கள் கிடைக்கும் என்றும் கூறியுள்ளது.

இது குறித்து பாஜக தேசிய நிர்வாகக் குழு உறுப்பினர் ஜி.வி.எல். நரசிம்மராவ் கூறுகையில்,

நாங்கள் நடத்திய தேர்தலுக்குப் பிந்தைய கருத்துக் கணிப்பின்படி எங்களுக்கு 166 இடங்களும் கூட்டணிக் கட்சிகளுக்கு 51 இடங்களுமாக மொத்தம் 217 இடங்களில் வெல்வோம்.

காங்கிரஸ் 140 இடங்களை தாண்டாது. கூட்டணியுடன் சேர்ந்து 175 இடங்களை மட்டும் காங்கிரஸ் கைப்பற்றும் என்றார்.