7 அமைச்சர் பதவி கேட்கும் திமுக-அழகிரிக்கு ரயில்வே?

டெல்லி: புதிய அமைச்சரவையில் திமுக ஏழு அமைச்சர் பதவிகளை கேட்டுள்ளதாகத் தெரிகிறது. மு.க.அழகிரிக்கு ரயில்வே அல்லது சுகாதாரத் துறையைக் கேட்கவும் திமுக திட்டமிட்டுள்ளதாகத் தெரிகிறது.

ஏற்கனவே திமுக வசம் உள்ள நெடுஞ்சாலைத்துறை, தகவல் தொழில்நுட்பம் மற்றும் முன்பு தன் வசம் இருந்த சுற்றுச்சூழல துறை உள்ளிட்ட முக்கிய துறைகளையும் தங்கள் வசமே மீண்டும் தர வேண்டும் என திமுக கோரவுள்ளது.

மதுரையில் அபார வெற்றி பெற்று நாடாளுமன்றத்திற்குள் நுழைந்துள்ள மு.க.அழகிரிக்காக ரயில்வே அல்லது சுகாதாரத் துறையைப் பெறவும் திமுக திட்டமிட்டுள்ளது.

சுகாதாரத் துறை இதுவரை பாமக வசம் இருந்தது. ரயில்வே அமைச்சராக லாலு பிரசாத் யாதவ் இருந்தார். பாமக இப்போது செயலிழந்து போய் விட்டது. லாலுவும் கூட மிகப் பெரிய தோல்வியைச் சந்தித்துள்ளார். எனவே இந்த முக்கியத் துறைகளை தங்கள் வசம் எடுத்துக் கொள்ள திமுக திட்டமிட்டுள்ளது.

டி.ஆர்.பாலு, ராசா ஆகியோருக்கு மீண்டும் கேபினட் பதவி உறுதி என்றாலும் ராசா வசமுள்ள தகவல் தொழில்நுட்பத்துறை மீண்டும் தயாநிதி மாறனுக்குத் தரப்படலாம் என்று தெரிறது. ராசாவுக்கு முன்பு அவர் வகித்த சுற்றுச்சூழல்துறை கிடைக்கலாம்.

இதுதவிர கனிமொழிக்கும் இம்முறை அமைச்சர் பதவியை திமுக பெறலாம் என எதிர்பார்க்கப்படுகிறது. அவருக்கு முக்கிய துறையின் இணையமைச்சர் பதவியை திமுக வழங்கலாம்.

மீண்டும் தாங்கள் ஆட்சிக்கு வர தமிழகத்தில் திமுக மாபெரும் பங்கு வகித்துள்ளதாலும் தொல்லை தராத தலைவர் என்பதாலும் முதல்வர் கருணாநிதி கேட்கும் துறைகளை சோனியாவும் பிரதமரும் வழங்குவர் என்று தெரிகிறது.