முதியவர் வயிற்றில் கர்ப்பப் பை!-அகற்றம்!!

திருவாரூர்: திருவாரூரில் 70 வயது முதியவருக்கு அறுவைச் சிகிச்சை செய்த போது அவருக்கு கர்ப்பப்பை இருந்தது தெரிய வந்தது. இதனையடுதது அதை மருத்துவர்கள் அகற்றினர்.

திருவாரூர் மாவட்டத்தைச் சேர்ந்தவர் சண்முகம். இவருக்கு 70 வயது.

வயிற்று வலி காரணமாக திருவாரூரில் உள்ள ஒரு தனியார் மருத்துவமனையில் சேர்க்கப்பட்டார். அங்கு இவரைப் பரிசோதித்த டாக்டர்கள், குடலிறக்கம் (அப்பன்டிசைடிஸ்) ஏற்பட்டுள்ளதாகவும், உடனே அறுவைச் சிகிச்சை செய்ய வேண்டும் எனவும் தெரிவித்தனர்.

இதனைத் தொடர்ந்து, அந்த முதியவருக்கு குடலிறக்க அறுவைச் சிகிச்சை செய்யப்பட்டது.

அப்போது, முதியவரின் வயிற்றுக்குள் ஒரு மீட்டர் நீளத்துக்கு குடல் நசுங்கி, ரத்த ஓட்டம் இல்லாமல் இருப்பது தெரிய வந்தது.

மேலும், அந்த குடல் அருகே கர்ப்பப்பை, சினைப்பை ஆகிவை இருந்ததும் கண்டுபிடிக்கப்பட்டது. வழக்கமாக இவை பெண்களுக்கு மட்டுமே இருக்கும். ஆனால் அது சண்முகத்திற்கு இருந்தது.

இதனையடுத்து, முதியவர் வயிற்றில் இருந்த கர்ப்பப்பை, சினைப்பை ஆகியவையும் அகற்றப்பட்டன.