டெல்லி வந்து சேர்ந்தார் மு.க.அழகிரி - நாளை பதவியேற்பு

டெல்லி: மதுரை லோக்சபா தொகுதி திமுக உறுப்பினர் மு.க.அழகிரி டெல்லி வந்து சேர்ந்துள்ளார். அவருடன் ராஜா உள்ளிட்ட திமுக எம்.பிக்களும் டெல்லி வந்துள்ளனர்.

நாளை நடைபெறவுள்ள அமைச்சரவை விரிவாக்கத்தின்போது அழகிரி உள்ளிட்டோர் அமைச்சர்களாக பதவியேற்பார்கள் எனத் தெரிகிறது.

திமுகவுக்கும், காங்கிரஸுக்கும் இடையிலான அமைச்சரவைப் பங்கீட்டுப் பிரச்சினை முடிவடைந்து விட்டது. காங்கிரஸ் தரும் 3 கேபினட் அமைச்சர்கள், நான்கு இணை அமைச்சர் பொறுப்புகளை ஏற்க திமுக தயாராகி விட்டது. யார் யாருக்கு அமைச்சர் பதவி என்பதையும் திமுக முடிவு செய்து விட்டதாக தெரிகிறது.

இந்த நிலையில் கேபினட் அமைச்சராக பொறுப்பேற்பார் என எதிர்பார்க்கப்படும் மதுரை எம்.பி. மு.க.அழகிரி, ராசா மற்றும் திமுக எம்.பிக்கள் டெல்லி வந்து சேர்ந்துள்ளனர்.

இதன் மூலம் மத்திய அமைச்சரவையில் திமுக சேருவது உறுதியாகியுள்ளது.