நாளை மத்திய அமைச்சரவை விஸ்தரிப்பு - திமுக உள்ளிட்ட கட்சிகள் பதவியேற்கும்

டெல்லி: மத்திய அமைச்சரவை நாளை முதலாவது விரிவாக்கத்தைக் காணவுள்ளது. திமுக உள்ளிட்ட கட்சிகளைச் சேர்ந்த அமைச்சர்கள் நாளை பதவியேற்பார்கள்.

பிரதமர் மன்மோகன் சிங் தலைமையிலான அமைச்சரவை கடந்த வெள்ளிக்கிழமை பதவியேற்றது. திமுகவுக்கான அமைச்சர் பதவிகளை முடிவு செய்வதில் மிகப் பெரிய குழப்பமும், இழுபறியும் ஏற்பட்டதால், 19 கேபினட் அமைச்சர்கள் மட்டுமே அன்றைய தினம் பதவியேற்றுக் கொண்டனர்.

இந்த நிலையில் திமுகவுடனான இழுபறி முடிவுக்கு வந்துள்ளதாக தெரிகிறது. இதையடுத்து நாளை அமைச்சரவை விரிவுபடுத்தப்படுகிறது.

இந்த விரிவாக்கத்தின்போது திமுக உள்ளிட்ட கட்சிகளைச் சேர்ந்த அமைச்சர்கள் பதவியேற்பார்கள் எனத் தெரிகிறது.

நாளைய அமைச்சரவை விரிவாக்கத்தின்போது கிட்டத்தட்ட 60 பேர் பதவியேற்பார்கள் எனத் தெரிகிறது.

கூட்டணிக் கட்சிகளைச் சேர்ந்த கேபினட் அமைச்சர்கள், துணை அமைச்சர்கள் தவிர காங்கிரஸ் கட்சியைச் சேர்ந்த பல்வேறு துணை அமைச்சர்களும் நாளை பதவியேற்பார்கள்.