டி.ஆர்.பாலுவுக்கு துணை சபாநாயகர் பதவி கிடைக்கவும் வாய்ப்பில்லை?

டெல்லி: மத்திய அமைச்சராகும் வாய்ப்பு மறுக்கப்பட்ட டி.ஆர்.பாலுவுக்கு இப்போது துணை சபாநாயகர் பதவியும் கிடைக்காது என கூறப்படுகிறது.

மத்திய அமைச்சர் பதவி தர முடியாது என பாலு மற்றும் ராஜாவுக்கு முதலில் காங்கிரஸ் மறுப்பு தெரிவித்தது. பின்னர் சமரசப் பேச்சுக்களைத் தொடர்ந்து ராஜாவை சேர்த்துக் கொள்ளவும், அதே சமயம் பாலு நிச்சயம் அமைச்சராகக் கூடாது எனவும் காங்கிரஸ் தரப்பில் கூறப்பட்டது.

இதையடுத்து பாலுவுக்கு துணை சபாநாயகர் பொறுப்பை வாங்க திமுக தீவிரமாக முயற்சித்தது. இது கிடைக்கும் எனவும் எதிர்பார்க்கப்பட்டது. ஆனால் தற்போது அதுவும் கிடைக்காது என கூறப்படுகிறது.

இருப்பினும் திமுக தரப்பு தொடர்ந்து முயன்று வருவதாகவும், கெளரவமான ஒரு பொறுப்பை பாலுவுக்கு வாங்கி விடுவதில் முதல்வர் கருணாநிதி தீவிரமாக இருப்பதாகவும் கூறப்படுகிறது.

இதற்கிடையே பாலுவின் வசம் இருந்த சாலை போக்குவரத்து மற்றும் கப்பல் போக்குவரத்துத் துறை முன்னாள் கர்நாடக முதல்வர் வீரப்ப மொய்லியிடம் தரப்படும் என்று தெரிகிறது.