நாங்கள் வென்றால் மோசமான மிஷினா?-கருணாநிதி

சென்னை: சென்ற முறை அவர்கள் வெற்றி பெற்றபோது வாக்கு எந்திரத்தில் கோளாறு இல்லை. இப்போது கோளாறா? ஜெயித்தால் நல்ல எந்திரம். தோற்றால் மோசமான எந்திரமா? என்று எதிர்க் கட்சியினருக்கு முதல்வர் கருணாநிதி கேள்வி எழுப்பியுள்ளார்.

அமைச்சர் கே.பி.பி.சாமியின் மகள் உதயாவின் திருமணம் அண்ணா அறிவாலயத்தில் இன்று நடந்தது. முதல்வர் கருணாநிதி தலைமை தாங்கி திருமணத்தை நடத்தி வைத்து பேசியதாவது:

கே.பி.பி.சாமி என்றாலே என்னிடத்தில் ஒரு தனி சலுகை உண்டு. அவருடைய தந்தை சுயமரியாதை இயக்கத்தில் தூய தொண்டராக இருந்தார்.

அடக்குமுறைக்கு அஞ்சாத குடும்பத்தைச் சேர்ந்த கே.பி.பி.சாமி மக்களிடம் அன்பும் ஆதரவும் பெற்று எம்எல்ஏ ஆகி, அமைச்சராக பொறுப்பேற்றுள்ளார். இவரது தந்தை தனது மகன் அமைச்சர் ஆவான் என்பதற்காக திமுகவில் உழைக்கவில்லை. மீனவர் சமுதாயத்தைச் சேர்ந்த இவர் அனைவரும் விரும்பும் வாளை மீனாக, சமுதாய தொண்டராக விளங்குகிறார்.

அடுக்கடுக்காக வெற்றி பெற்றாலும், தோல்வி வந்தாலும் சமமாக மதிக்க வேண்டும். இன்று சிலர் வெற்றி பெற முடியாததற்கு என்ன காரணம் என்று தேடிக் கண்டுபிடித்துக் கொண்டிருக்கிறார்கள். நடந்து முடிந்த நாடாளுமன்றத் தேர்தலின் போது பிரசாரம் செய்த கம்யூனிஸ்டுகள், நாங்கள் அதிக இடம் பிடித்து மத்தியில் ஆட்சிக்கு வந்தால் திமுக ஆட்சியை கலைப்போம் என்று பேசினார்கள்.

திமுக ஆட்சி முன்பு கலைக்கப்பட்ட போது, அதற்கு கண்டனம் தெரிவித்தவர் எனது நண்பர் மேற்கு வங்காள முன்னாள் முதல்வர் ஜோதிபாசு. பாரம்பரியமான அந்த கட்சியைச் சேர்ந்தவர்கள் இன்று மேடைக்கு மேடை திமுக ஆட்சியை கலைப்போம் என்று பேசியதையும் நான் எண்ணிப் பார்த்தேன்.

இதை எல்லாம் மக்கள் புரிந்து கொண்டு நாங்கள் செய்த கடமைக்கு நன்றி உள்ளவர்கள் என்பதை நிரூபித்து காட்டி இருக்கிறார்கள். தோல்வி அடைந்தவர்கள் இதை எல்லாம் யோசிக்க வேண்டும்.

1991ல் ராஜீவ் காந்தி ஸ்ரீபெரும்புதூரில் முற்றாக மாய்க்கப்பட்டார். அவர் மறைந்த 10வது நாளில் நடந்த பொதுத் தேர்தலில் திமுகவுக்கு கிடைத்தது ஒரே ஒரு இடம். 234 தொகுதிகளில் துறைமுகத்தில் நான் மட்டும் வெற்றி பெற்றேன். அதற்காக ஓட்டு சீட்டையும், ஓட்டு பெட்டியையும், மிஷினையும் குறை சொல்லவில்லை.

மக்கள் தீர்ப்பு மகேசன் தீர்ப்பு என்று அண்ணா சொன்ன கருத்தை ஏற்றுக் கொண்டோம். சென்ற முறை அவர்கள் வெற்றி பெற்றபோது மிஷினில் கோளாறு இல்லை. இப்போது கோளாறா? ஜெயித்தால் நல்ல எந்திரம். தோற்றால் மோசமான மிஷினா?

நாங்கள் 28 தொகுதிகளில் வெற்றி பெற்றோம். அங்கு உங்கள் சின்னத்தில் ஓட்டு போட்டால் உதயசூரியன் சின்னத்தில் விழுகிறது. நீங்கள் வெற்றி பெற்ற 12 இடங்களில் மட்டும் உங்கள் கட்சி சின்னத்தில் ஓட்டு போட்டால் உங்கள் கட்சி சின்னத்திற்கு ஓட்டு விழுகிறதா?. சொல்லுபவர்கள் சிந்தித்து பார்க்க வேண்டும். பைத்தியக்காரத்தனமாக யோசிக்க கூடாது என்றார் கருணாநிதி.