6.7% வளர்ச்சியில் இந்தியப் பொருளாதாரம்

டெல்லி: இந்தியப் பொருளாதாரத்தின் வளர்ச்சி எதிர்பார்த்ததை விட சற்று அதிகமாகவே இந்த ஆண்டு வளர்ச்சி பெற்றுள்ளது. புதிய அரசுக்கு இது பெரும் உற்சாகத்தைக் கொடுக்கும் என நம்பப்படுகிறது.

கடந்த நிதியாண்டில் 9 சதவிகித பொருளாதார வளர்ச்சியுடன் முதல் நிலையில் இருந்தது இந்தியா. இந்த வளர்ச்சியைப் பார்த்து பல வெளிநாடுகள் மிரண்டன என்பதுதான் உண்மை.

ஆனால் எதிர்பாராத விதமாக சர்வதேச பொருளாதார வீழ்ச்சியில் இந்தியாவும் சிக்குண்டுவிட, வேக வேக சரிவு ஏற்பட்டது பல துறைகளிலும்.

இதனால் 2009 மார்ச் 31-ம் தேதியுடன் முடியும் நிதியாண்டுக்கான பொருளாதார வளர்ச்சி 6 சதவீதம் வரைதான் இருக்கும் என கணித்து வந்தனர் வல்லுநர்கள். ஆனால் கணிப்பை பொய்யாக்கும் விதத்தில் இன்னும் அதிக வளர்ச்சியை அடைந்துள்ளது இந்தியப் பொருளாதாரம்.

கடந்த மார்ச் 31-ம் தேதியுடன் முடிந்த நிதியாண்டில் 6.7 சதவிகித வளர்ச்சியை இந்தியப் பொருளாதாரம் பெற்றுள்ளது.

இதுகுறித்து கருத்து தெரிவித்த இந்திய நிதி அமைச்சர் பிரணாப் முகர்ஜி, வரும் நிதியாண்டில் இந்த வளர்ச்சியை இரட்டை இலக்கத்துக்குக் கொண்டு செல்வதே நமது அரசின் இலக்கு. பொருளாதார வளர்ச்சியோடு சாமானிய மனிதர்களின் வாழ்க்கை நிலையையும் உடர்த்த வேண்டும். அதுதான் இனி நமது ஒரே லட்சியம், என்றார்.