துணை முதல்வர் பதவி அல்ல, கூடுதல் பொறுப்பு: ஸ்டாலின்

சென்னை: தமிழகத்திலிருந்து 28 தொகுதிகள் கிடைத்ததுதான் பரிசு, துணை முதல்வர் பதவி அல்ல. இது பதவி அல்ல, கூடுதல் பொறுப்புதான் என்று கூறியுள்ளார் துணை முதல்வர் மு.க.ஸ்டாலின்.

துணை முதல்வராக நியமிக்கப்பட்ட பின்னர் செய்தியாளர்கள் ஸ்டாலினை சந்தித்தனர். அப்போது, துணை முதல்வர் பதவியை கூடுதல் பதவியாக கருதுகிறீர்களா என்ற கேள்விக்கு, துணை முதல்வர் பதவியை நான் பதவியாக கருதவில்லை. கூடுதல் பொறுப்பாகவே கருதுகிறேன்.

நான் எம்.எல்.ஏ.வாக இருந்தபோதிலும், மேயராக இருந்தபோதிலும், அமைச்சராக இருந்தபோதிலும், கட்சியில் துணைச் செயலாளராக இருந்தபோதிலும், பொருளாளராக இருந்தபோதிலும் அவற்றை நான் பதவியாக கருதவில்லை. அனைத்தையும் பொறுப்பாகவே கருதினேன்.

முதல்வரும், தி.மு.க. தலைவருமான கருணாநிதியின் அறிவுரைபடியும், ஆலோசனையின்பேரில்தான் செயல்பட்டு வந்துள்ளேன். இனிமேலும் அதை தான் செய்ய உள்ளேன்.

இந்தப் பதவியை சுமையாகவும் கருதவில்லை, சுகமாகவும் கருதவில்லை என்றார்.

துணை முதல்வராக பதவியேற்பது எப்போது என்ற கேள்விக்கு, நான் அமைச்சர் பொறுப்பில் ஏற்கனவே இருப்பதால், துணை முதல்வர் பொறுப்பு வகிக்க தனியாக பதவி ஏற்க தேவையில்லை.

ஏற்கனவே உள்ள திட்டங்களையும், புதிய திட்டங்களையும் செம்மைபடுத்தி சிறப்பாக நிறைவேற்றுவேன். ஏற்கனவே நான் இருந்த பொறுப்புகளில் பொறுப்புடன் இருந்து பொறுப்புகளை நிறைவேற்றியதுபோல, துணை முதல்வராக இருந்து பொறுப்புகளை பொறுப்பாக இருந்து பொறுப்போடு நிறைவேற்றுவேன் என்றார் ஸ்டாலின்.