அமைச்சரவையில் ஸ்டாலினுக்கு 3வது இடம்!
சென்னை: துணை முதல்வராக நியமிக்கப்பட்டுள்ள மு.க. ஸ்டாலின் அமைச்சரவை வரிசையில் முதல்வர் கருணாநிதி, நிதியமைச்சர் அன்பழகன் ஆகியோருக்கு அடுத்த 3வது நிலையில் இருந்து பணியாற்றுவார் என்று தமிழக அரசு அறிவித்துள்ளது.
உள்ளாட்சி, ஊரக வளர்ச்சித் துறை அமைச்சரான ஸ்டாலினிடம் முதல்வர் கருணாநிதி நிர்வகித்து வந்த பொது நிர்வாகம், மாவட்ட வருவாய் அதிகாரிகள், தொழில்கள், சிறுபான்மையினர் நலன், பாஸ்போர்ட்டுகள், சிறப்பு முனைப்புகள், சமூக சீர்திருத்தம் ஆகிய துறைகள் ஒப்படைக்கப்பட்டுள்ளன.
மேலும் அவருக்கு அமைச்சரவை வரிசையில் 3வது இடம் அளிக்கப்பட்டுள்ளது.
இது தொடர்பாக தமிழக அரசு வெளியிட்டுள்ள செய்தி குறிப்பில்,
துணை முதல்வர் மு.க. ஸ்டாலின் அமைச்சரவை வரிசையில் முதல்வர், நிதியமைச்சர் ஆகியோருக்கு அடுத்து 3வது நிலையில் இருந்து பணியாற்றுவார் என்று கூறப்பட்டுள்ளது.
கவர்னரை சந்தித்தார் ஸ்டாலின்:
இந் நிலையில் துணை முதல்வர் ஸ்டாலின், தமிழக ஆளுநர் சுர்ஜித்சிங் பர்னாலாவை சந்தித்துப் பேசினார். மரியாதை நிமித்தமாக இச் சந்திப்பு நடந்ததாக அரசு தெரிவித்துள்ளது.