'மிக்' போர் விமானம் விபத்து-பைலட் தப்பினார்!

டெல்லி: இந்திய விமானப்படைக்குச் சொந்தமான மிக் 21 ரக போர் விமானம் இன்று மேல் அஸ்ஸாமில் சபுவா என்ற இடத்தில் விபத்தில் சிக்கியது. அதிர்ஷ்டவசமாக பைலட் உயிர் தப்பி விட்டார்.

மிக் ரக விமானங்கள் தொடர்ந்து விபத்தில் சிக்கி வருகின்றன. இந்த நிலையில் இன்று மேல் அஸ்ஸாமில் உள்ள சபுவா என்ற இடத்தில், மிக் 21 ரக போர் விமானம் விபத்தில் சிக்கியது. இதில் பைலட் அதிர்ஷ்டவசமாக உயிர் தப்பினார்.

விமானம் விபத்தில் சிக்கப் போவதை உணர்ந்த பைலட் உடனடியாக காக்பிட்டிலிருந்து பாராசூட் மூலம் குதித்து தப்பி விட்டார்.

இன்று பிற்பகல் 2 மணியளவில் சபுவா விமான தளத்திலிருந்து இந்த விமானம் கிளம்பியது. புறப்பட்ட சில விநாடிகளிலேயே அதில் தொழில்நுட்பக் கோளாறு ஏற்பட்டது.

பயிற்சிக்காக அந்த விமானம் கிளம்பியபோது இந்த விபத்து ஏற்பட்டது.

இந்த ஆண்டில் விபத்தில் சிக்கும் 6வது விமானப்படை விமானம் இது என்பது குறிப்பிடத்தக்கது. ஜனவரி 21ம் தேதி சூர்ய கிரண் ரக விமானமான எம்கே2 விபத்தில் சிக்கியது. ஏப்ரல் 30ல் சுகோய், மே 15ல் மிக் 27, மே 27ல் மிக் 21 பைசன், ஜூன் 9ம் தேதி ஏஎன் 32 ரக விமானம் விபத்தில் சிக்கின என்பது குறிப்பிடத்தக்கது.