வானில் நிலைதடுமாறிய ஆஸ்திரேலிய விமானம்

ஹாங்காங்: ஹாங்காங்கில் இருந்து ஆஸ்திரேலியாவின் பெர்த் நகருக்குச் சென்று கொண்டிருந்த குவாண்டாஸ் ஏர்வேஸ் நிறுவன (Qantas Airways) விமானம் வானில் பயங்கர 'டர்புலன்ஸை' சந்தித்து நிலை தடுமாறியது. இதில் 6 பயணிகள் இருக்கைகளில் இருந்து தூக்கி எறியப்பட்டு காயமடைந்தனர்.

வானில் காற்றோட்டம் குறைந்த வெற்றிடத்துக்குள் (air pocket) விமானம் நுழையும் போதோ அல்லது அதிக காற்றோட்டம் உள்ள இடத்தில் நுழையும்போதோ டர்புலன்ஸ் ஏற்படுவது வழக்கம்.

இந் நிலையில் இன்று காலை இந்த ஆஸ்திரேலிய விமானம் மிகக் கடுமையான ஏர் பாக்கெட்டில் நுழைந்ததால் அது நிலை தடுமாறியது. விமானம் தடுமாறியதில் பல பயணிகள் இருக்கைகளில் இருந்து தூக்கி வீசப்பட்டனர். இதில் 6 பேர் காயமடைந்தனர். இதில் விமான சிப்பந்தி ஒருவரும் அடங்குவார்.

QF68 என்ற அந்த ஏர்பஸ் 330 ரகத்தைச் சேர்ந்த விமானம் பெரும் போராட்டத்துக்குப் பின் நிலைக்குக் கொண்டு வரப்பட்டு பெர்த் நகரில் பத்திரமாக தரையிறங்கியது. காயமடைந்த 6 பயணிகளும் மருத்துவமனையில் சேர்க்கப்பட்டனர்.

பிரேசிலில் இருந்து பிரான்ஸ் வந்து கொண்டிருந்த ஏர்பஸ் 330 விமானமும் இதேபோல டர்புலன்ஸ் காரணமாகவே விபத்துக்குள்ளானதாகக் கருதப்படும் நிலையில் இந்த சம்பவம நடந்துள்ளது.

இந்த சம்பவம் குறித்து ஆஸ்திரேலிய போக்குவரத்துத்துறை உடனடி விசாரணையை ஆரம்பித்துள்ளது.