'எல் நினோ': இந்த ஆண்டு 70% மழை குறையும்!

டெல்லி: இந்த ஆண்டு இந்தியாவில் 70 சதவீதம் அளவுக்கு மழை குறைவாக இருக்கும் என்று எதிர்பார்க்கப்படுகிறது.

இதற்கு எல் நினோ காரணமாகக் கூறப்படுகிறது. பசிபிக் கடல் பகுதியில் வெப்பம் அதிகரிப்பதால் ஏற்படும் வானிலை மாற்றம் தான் எல் நினோ. இதனால் தென் அமெரிக்காவிலிருந்து தென் கிழக்கு ஆசியாவை நோக்கி வீசும் காற்றின் வேகம் குறையும். இதனால் மழை குறையும்.

இந்த ஆண்டு எல் நினோ ஏற்பட 50 சதவீத வாய்ப்புள்ளதாக ஆசிய நாடுகளை சர்வதேச வானிலை ஆய்வு மையம் (WMO) எச்சரித்துள்ளது.

இந்தியாவில் ஏற்கனவே பருவ மழை வேகம் பிடிக்காத நிலையில் இந்த அறிவிப்பு பெரும் வேதனையாக வந்து சேர்ந்துள்ளது. கேரளத்திலும் மும்பை உள்ளிட்ட நாட்டின் மேற்குப் பகுதிகளில் எதிர்பார்த்தபடி ஆரம்பித்த பருவ மழை அப்படியே நின்றுவிட்டது. தொடர்ந்து மழை பெய்யவில்லை.

உரிய காலத்தில் மழை பெய்யாவிட்டால் நாட்டின் விவசாய உற்பத்திக்கு பெரும் பாதிப்பு ஏற்படும். நதி நீர் பங்கீட்டு விஷயத்தில் மாநிலங்களிடையிலான மோதலும் தீவிரமாகும் என மத்திய அரசு அச்சத்தில் ஆழ்ந்துள்ளது.

சர்வதேச பொருளாதார மந்த நிலையால் ஏற்பட்டுள்ள தாக்கத்தை இது மேலும் மோசமாக்கும் என அஞ்சப்படுகிறது. இதனால் நாட்டின் வளர்ச்சி விகிதம் மேலும் சரியும் என்று தெரிகிறது.

எல் நினோ ஏற்படும்போதெல்லாம் இந்தியாவில் 70 சதவீதம் அளவுக்கு மழை குறைந்தது. 2002 மற்றும் 2004 ஆகிய ஆண்டுகளில் எல் நினோவின் தாக்கத்தை இந்தியா சந்தித்தது.

பருவ மழை பெய்யாவிட்டால் நாட்டில் 65 சதவீத அளவுக்கு விவாசயம் பாதிக்கப்படும் என்று தெரிகிறது.