13 வயது மாணவி-ராணுவ வீரர் திருமணம்!-எதிர்த்து வழக்கு

மதுரை: 13 வயதே ஆகும் பள்ளி மாணவியை 36 வயதாகும் ராணுவ வீரருக்குத் திருமணம் செய்து வைப்பதைத் தடுக்கக் கோரி அந்த சிறுமியின் சித்தப்பா மதுரை உயர்நீதிமன்றக் கிளையில் வழக்கு தொடர்ந்துள்ளார்.

மதுரை மாவ்டடம் பிரவியம்பட்டியைச் சேர்ந்தவர் ஹரிச்சந்திரன். மதுரை உயர்நீதிமன்றக் கிளையில் இவர் தாக்கல் செய்துள்ள மனு விவரம்..

அதிமுக கிளைச் செயலாளரான எனது சகோதரர் ரவிச்சந்திரனின் மகள் பானு. 13 வயதாகும் இவர், கருமாத்தூர் புனித கிளாரட் மேல்நிலைப்பள்ளியில் 9-வது வகுப்பு படித்து வருகிறார்.

ஒச்சாத்தேவர் என்பவர் ராணுவ வீரராவார். இவருக்கு வயது 36 ஆகிறது. இவரிடம், எனது சகோதரர் பெருமளவில் கடன் வாங்கியிருந்தார். அதிக வட்டிக்கு வாங்கிய அந்தக் கடனைத் திருப்பிச் செலுத்த முடியவில்லை.

இந்த நிலையில் எனது சகோதரரின் நிலையைப் பயன்படுத்திக் கொண்டு ஒச்சாத்தேவர், எனது அண்ணன் மகள் பானுவை தனக்கு கல்யாணம் செய்து தருமாறு நெருக்கியுள்ளார். இதை மறுக்க முடியாமல் எனது அண்ணனும் ஏற்றுக் கொண்டுள்ளார்.

இதை நாங்கள் கண்டித்துக் கேட்டபோது, ரவிச்சந்திரன் அதை கேட்காமல், கல்யாணத்தை முடிவு செய்து விட்டார். பத்திரிக்கை அடித்தும் விட்டனர்.

இந்தத் திருமணம், குழந்தைகள் திருமண தடைச் சட்டத்துக்கு எதிரானது. எனவே இந்தத் திருமணத்தை தடுத்து நிறுத்த உத்தரவிட வேண்டும் என்று கோரியிருந்தார்.

இந்த மனு நீதிபதி ஆர்.எஸ்.ராமநாதன் முன்னிலையில் விசாரணைக்கு வந்தது. மனுவை விசாரித்த நீதிபதி, இதுகுறித்து விசாரிக்க பள்ளி மாணவி பானுவையும், அவருடைய பெற்றோரையும் இன்று கோர்ட்டில் ஆஜர்படுத்துமாறு கூறி உத்தரவிட்டார்.