சிங்கப்பூருக்கு சுற்றுலா செல்வதில் இந்தியர்கள் நம்பர் 2!

சிங்கப்பூர்: சிங்கப்பூருக்கு வருகை தரும் வெளிநாட்டு சுற்றுலாப் பயணிகளில் இந்தியர்கள் 2வது இடத்தில் உள்ளனர்.

இந்த ஆண்டு மே மாதம் 90 ஆயிரம் இந்தியர்கள் சிங்கப்பூருக்கு வருகை தந்தனர்.

இதுகுறித்து சிங்கப்பூர் சுற்றுலா வாரியம் கூறியதாவது..

சிங்கப்பூருக்கு சுற்றுலா வருவோரில் இந்தியர்கள் 2வது இடத்தில் உள்ளனர். இந்த ஆண்டு மே மாதம் 90 ஆயிரம் பேர் சிங்கப்பூருக்கு வந்தனர். கடந்த ஆண்டுடன் ஒப்பிடுகையில் இது 13 சதவீதம் குறைவாகும்.

மே மாதத்தில் இந்தோனேசியர்கள் 1 லட்சத்து 29 ஆயிரம் பேர் சிங்கப்பூர் வந்தனர். இவர்கள்தான் முதலிடத்தைப் பிடித்துள்ளனர். 3வது இடத்தில் ஆஸ்திரேலியா (59,000), நான்காவது இடத்தில் மலேசியா (55,000), ஐந்தாவது இடத்தில் சீனா (52,000 பேர்) உள்ளனர்.

இருப்பினும் பன்றிக் காய்ச்சல் பீதி காரணமாக இந்த ஆண்டு மே மாதத்தில் சுற்றுலாப் பயணிகளின் எண்ணிக்கை 143 சதவீதம் குறைந்து விட்டது. இந்த ஆண்டு மே மாதம் 7 லட்சத்து 30 ஆயிரம் சுற்றுலாப் பயணிகள் சிங்கப்பூருக்கு வந்திருந்தனர் என்று அதில் தெரிவிக்கப்பட்டுள்ளது.