நாளை மத்திய பட்ஜெட்: வருமான வரி விலக்கு உள்ளிட்ட சலுகைகள் இருக்கலாம்

டெல்லி: மத்திய நிதியமைச்சர் பிரணாப் முகர்ஜி நாளை மத்திய பொது பட்ஜெட்டைத் தாக்கல் செய்கிறார். வருமான வரி உச்சவரம்பு உயர்வு உள்ளிட்ட பல்வேறு சலுகைகள் இதில் இடம் பெறும் என எதிர்பார்க்கப்படுகிறது.

லோக்சபா தேர்தலில் வென்று ஐக்கிய முற்போக்குக் கூட்டணி மீண்டும் ஆட்சியைப் பிடித்துள்ள நிலையில் நேற்று முன்தினம் ரயில்வே பட்ஜெட் தாக்கல் செய்யப்பட்டது.

இந்த நிலையில் நாளை பொது பட்ஜெட்டைத் தாக்கல் செய்யவுள்ளார் பிரணாப் முகர்ஜி.

ரயில்வே பட்ஜெட்டைப் போல இதிலும் மக்களைப் பெரிய அளவில் பாதிக்காமல் பல்வேறு சலுகைகள் இருக்கலாம் என எதிர்பார்க்கப்படுகிறது.

மாத ஊதியம் பெறுவோர், வருமான வரி உச்சவரம்பு அதிகரிக்கப்படும் என்ற எதிர்பார்ப்பில் உள்ளனர். ரூ. 2.5 லட்சம் வரை இந்த உச்சவரம்பு உயர்த்தப்படக் கூடும் என்ற பொதுவான எதிர்பார்ப்பு உள்ளது.

6வது ஊதியக் கமிஷன் பரி்ந்துரைகள் நாடு முழுவதும் கிட்டத்தட்ட அமல்படுத்தப்பட்டுள்ளன. இதனால் அரசு ஊழியர்களின் ஊதியம் கணிசமாக உயர்ந்துள்ளது. ஆனால் தற்போதைய உச்சவரம்பே தொடர்ந்தால், இந்த ஊதிய உயர்வின் பலன் அரசு ஊழியர்களுக்குக் கிடைக்காமல் போய் விடும். எனவே நிச்சயம் வருமான வரி உச்சரவரம்பு அதிகரிக்கப்படும் என்று எதிர்பார்க்கப்படுகிறது.

மேலும் பல்வேறு வரி சீரமைப்புத் திட்டங்களும் அறிவிக்கப்படும் எனத் தெரிகிறது. இதுகுறித்து பொருளாதார ஆய்வறிக்கையில் தெளிவாக தெரிவிக்கப்பட்டுள்ளது.

சில வரிகள் ரத்து செய்யப்படலாம். சில வரிகள் குறைக்கப்படலாம்.

புதிய வரி விதிப்புகளால் மக்களுக்குப் பெருமளவில் பாதிப்பு ஏற்படாத வகையில் பார்த்துக் கொள்ளப்படும் எனவும் எதிர்பார்க்கப்படுகிறது.