கச்சா எண்ணெய்: பேரலுக்கு 65 டாலராகக் குறைந்தது!

சிங்கப்பூர்: சர்வதேச சந்தையில் கச்சா எண்ணெயின் விலை மேலும் குறைந்து பேரலுக்கு 65 டாலருக்கு விற்பனையாகிறது.

அமெரிக்கப் பொருளாதாரம் இப்போதைக்கு மீட்சிப் பாதைக்குத் திரும்பும் அறிகுறி இல்லை என அந்நாட்டு அரசு அதிகாரப் பூர்வமாக அறிவித்துவிட்டதால், பெட்ரோலியப் பொருட்களுக்கான தேவை மேலும் குறைந்துள்ளது.

அமெரிக்காவின் வேலையின்மை சதவிகிதமும் எதிர்பார்ப்புக்கு மாறாக பெருமளவு உயர்ந்துள்ளது.

இன்றைய வர்த்தகத்தின்படி நியூயார்க் மெயின் காண்ட்ராக்டில் கச்சா எண்ணெய் விலை பேரல் 64.84 டாலராகவும், பிரண்ட் நார்த் ஸீ க்ரூட் விலை பேரலுக்கு 64.60 டாலராகவும் விற்பனையாகிறது.

கச்சா எண்ணெய் விலை குறைந்தால், இந்தியாவிலும் பெட்ரோல் –டீஸல் விலை குறைப்போம் என நேற்றுதான் மத்திய பெட்ரோலிய அமைச்சர் முரளி தியோரா முழங்கினார். இன்றைக்கு அவர் எதிர்பார்த்ததை விட இன்னும் 4 டாலர்கள் குறைந்துள்ளது கச்சா எண்ணெய் விலையில்.

குறைக்கப்படுமா பெட்ரோல் விலை?