கச்சா எண்ணெய் விலை 60 டாலருக்கும் கீழ் சரிந்தது!

லண்டன்: கச்சா எண்ணெய் விலை சர்வதேச சந்தையில் 60 டாலர்களுக்கும் கீழே குறைந்தது. நேற்று ஒரு பீப்பாய் கச்சா எண்ணெயின் விலை 59.49 டாலர்களுக்கு விற்பனையானது. ஆனால் 65 டாலருக்கும் கீழே விலை சரிந்தால் பெட்ரோல் டீஸல் விலையைக் குறைப்பதாகச் சொன்ன இந்திய அரசு இன்னும் அமைதி காக்கிறது.

கச்சா எண்ணெய் விலை பல மாதங்களாக வீழ்ச்சிப் போக்கிலேயே இருந்தது. ஆனால் திடீரென்று கடந்த மாதத்தில் சில தினங்கள் மட்டும் விலை ஏற்றம் கண்டது. மூன்று தினங்கள் மட்டும் 73 டாலர்களாக விற்பனையானது.

அவ்வளவுதான்... உடனே குய்யோ முறையோ என அலறி அடித்துக் கொண்டு பெரும் அளவு பெட்ரோல் டீஸல் விலைகளை ஏற்றியது இந்திய அரசு.

இதனால் உச்சத்துக்குப் போன பல அத்தியாவசியப் பொருட்களின் விலைகள் இனி எப்போது இறங்கும் என்று யாருக்கும் தெரியாது.

ஆனால் மத்திய பெட்ரோலியத் துறையின் கணிப்புகளுக்கு மாறாக, மீண்டும் மளமளவென்று சரிய ஆரம்பித்துள்ளது கச்சா எண்ணெய் விலை. தொடர்ந்து 13வது நாளாக கச்சா எண்ணெய் விலை குறைந்துள்ளது. நாளொன்றுக்கு சராசரியாக 1.10 டாலர் அளவுக்கு கச்சா எண்ணெய் விலை குறைந்துள்ளது.

ஆனால் தொடர்ந்து நஷ்டக் கணக்கு காட்டி வரும் இந்திய எண்ணெய் நிறுவனங்களும், மத்திய பெட்ரோலியத் துறை அமைச்சர் முரளி தியோராவும் இப்போது வாய் மூடி மௌனம் சாதிக்கின்றனர்.

இன்று மேலும் ஒரு டாலர் குறைந்த கச்சா எண்ணெய் 59.49 டாலருக்கு விற்பனையானது.

கடந்த ஜனவரியில் 11 சதவிகிதம் கச்சா எண்ணெய் விலை சரிந்தது. இந்த வாரம் வீழ்ச்சியின் சதவிகிதம் 10 ஆக உள்ளது. இந்த வீழ்ச்சி வரும் வாரமும் தொடரும் என எதிர்பார்ப்பதாக பிஎன்பி பாரிபாஸ் நிறுவனம் கணித்துள்ளது.