ஆஸ்திரேலிய கிளைக்கு 100 ஊழியர்களை எடுக்கும் இன்போசிஸ்
மெல்போர்ன்: தனது ஆஸ்திரேலிய கிளைக்கு 100 ஊழியர்களைத் தேர்வு செய்கிறது இன்போசிஸ். அத்தனை பேரையும் உள்ளூரிலேயே அது தேர்வு செய்யவுள்ளது.
கடந்த வாரம் இன்போசிஸ் நிறுவனத்திற்கு 450 மில்லியன் ஆஸ்திரேலியன் டாலர் மதிப்பிலான புதிய கான்டிராக்ட் கிடைத்தது. இதையடுத்து புதிதாக 100 ஆஸ்திரேலிய தகவல் தொழில்நுட்ப வல்லுனர்களை அது தேர்வு செய்யவுள்ளது.
சீனியர் பதவி முதல் நடுத்தர ரக பதவி வரை ஆளெடுப்பு நடைபெறவுள்ளது.
மேலும் பட்டப்படிப்பை முடித்து சில ஆண்டுகளே ஆனவர்களையும் கூட எடுக்கவுள்ளனராம்.
சிட்னி, மெல்போர்ன் நகரங்களில் ஆளெடுப்பு நடைபெறவுள்ளது. பணி ஆஸ்திரேலியாவில் என்றாலும் கூட சிலரை நியூசிலாந்துக்கும் அனுப்புவோம் என இன்போசிஸ் செய்தித் தொடர்பாளர் தெரிவித்துள்ளார்.
ஆஸ்திரேலியாவைச் சேர்ந்த டெல்ஸ்ட்ரா நிறுவனத்துடன் இணைந்து தனது ஆஸ்திரேலிய பணிகளை பார்க்கவுள்ளது இன்போசிஸ்.
தற்போது இன்போசிஸ் நிறுவனத்திற்கு ஆஸ்திரேலியா மற்றும் நியூசிலாந்தில் 2500 பணியாளர்கள் உள்ளனர். 1000 வாடிக்கையாளர்கள் உள்ளனர்.
பிரிஸ்பேன், மெல்போர்ன், பெர்த், சிட்னி நகரங்களில் இன்போசிஸின் அலுவலகங்கள் உள்ளன என்பது குறிப்பிடத்தக்கது.