பர்சனல் கம்ப்யூட்டர்கள் விற்பனையில் பெரும் சரிவு

டெல்லி: பிசி எனப்படும் பர்சனல் கம்ப்யூட்டர்களின் விற்பனை பெரும் சரிவைக் கண்டுள்ளது. இந்த நிதியாண்டில் கம்ப்யூட்டர் விற்பனை -7 சதவீதமாக சரிந்துள்ளது.

பொருளாதார சீர்குலைவு கம்ப்யூட்டர்களையும் இப்போது கடிக்கத் தொடஙகிவிட்டது. முதல் முறையாக கம்ப்யூட்டர் விற்பனை வளர்ச்சி விகிதம் நெகட்டிவ் அளவை எட்டி, -7 சதவீதமாக உள்ளது.

கடந்த ஆண்டில் இது 7 சதவீதமாக இருந்தது குறிப்பிடத்தக்கது.

இருப்பினும் பழையபடி மீண்டும் வளர்ச்சிப் பாதையில் கம்ப்யூட்டர் விற்பனை செல்லும் என ஹார்ட்வேர் தயாரிப்பாளர்கள் நம்பிக்கை தெரிவித்துள்ளனர்.

இதுகுறித்து தகவல் தொழில்நுட்ப உற்பத்தியாளர்கள் சங்க செயல் இயக்குநர் வின்னி மேத்தா கூறுகையில், பொருளாதாரத்தில் ஏற்பட்டுள்ள தடுமாற்றத்தால் வாடிக்கையாளர்களின் மன நிலையிலும் மாறுதல் காணப்பட்டது. இதுவே ஐடி துறையையும் பாதித்துள்ளது.

2008-09ம் ஆண்டில், டெஸ்க்டாப், நோட்புக்ஸ், நெட்புக்ஸ் ஆகியவற்றின் விற்பனை மொத்தமாக 67.9 லட்சமாக இருந்தது. கடந்த நிதியாண்டில் இது 73.3 லட்சமாக இருந்தது.

சந்தை வளர்ச்சி 2003ம் ஆண்டு முதல் 2009 வரையிலான கால கட்டத்தில் 17 சதவீத வளர்ச்சியில் உள்ளது.

தற்போது கம்ப்யூட்டர் விற்பனையில் சரிவு காணப்பட்டாலும் கூட 2009-2010 நிதியாண்டில் நிலைமை மாறும் என நம்புகிறோம்.

2009 நிதியாண்டில், டெஸ்க்டாப் விற்பனை 52.7 லட்சமாக இருந்தது. இது கடந்த ஆண்டை விட 4 சதவீதம் குறைவாகும். நோட்புக் எண்ணிக்கை (நெட்புக்கையும் சேர்த்து) 15.1 லட்சமாக இருந்தது. இது கடந்த ஆண்டை விட 17 சதவீதம் குறைவாகும் என்றார் வின்னி.