காங்கிரசில் இணைகிறார் திருநாவுக்கரசர்!

சென்னை: பாஜக அகில இந்தியச் செயலாளர் திருநாவுக்கரசர் காங்கிரஸ் கட்சியில் சேருவார் என்று தெரிகிறது.

திருநாவுக்கரசரின் 61வது பிறந்த நாள் விழா சென்னை தேனாம்பேட்டை காமராஜர் அரங்கத்தில் நடந்தது.

அப்போது தனக்கு வாழ்த்துச் சொல்ல வந்த மூத்த காங்கிரஸ் தலைவர் குமரி அனந்தனின் மகளும், பாஜக மாநில பொதுச் செயலருமான தமிழிசையிடம் இதை மறைமுகமாகத் தெரிவித்தார் திருநாவுக்கரசர்.

இதுவரை உங்களுடன் பணியாற்றினேன். இனி உங்கள் அப்பாவுடன் பணியாற்றப் போகிறேன் என்று திருநாவுக்கரசர் சிரித்துக் கொண்டே தமிழிசையிடம் கூறினார்.

மக்களவைத் தேர்தல் முடிவுக்குப் பிறகு நடந்த பாஜக மாநில நிர்வாகிகள் கூட்டம், மாநில செயற்குழுக் கூட்டம் என கட்சியின் அனைத்துக் கூட்டங்களையும் திருநாவுக்கரசரும், அவரது ஆதரவாளர்களும் புறக்கணித்து வருகின்றனர்.

இந் நிலையில் ராகுல் காந்தி உள்ளிட்ட சில காங்கிரஸ் தலைவர்களை திருநாவுக்கரசர் டெல்லியில் சந்தித்துப் பேசியுள்ளதாகத் தெரிகிறது.

இதனால் விரைவில் பாஜக மாநிலங்களவை எம்பி பதவியை ராஜிநாமா செய்துவிட்டு திருநாவுக்கரசர் காங்கிரஸ் கட்சியில் சேருவார் என்று தெரிகிறது.