உத்தரகாண்ட் மாநில ஆளுநராக மார்கரெட் ஆல்வா நியமனம்

டெல்லி: காங்கிரஸ் மூத்த தலைவர் மார்கரெட் ஆல்வா உத்தரகாண்ட் மாநில ஆளுநராக நியமிக்கப்பட்டுள்ளார்.

நேற்று மாலை 7 மாநில ஆளுநர்கள் நியமனத்தை குடியரசுத் தலைவர் மாளிகை வெளியிட்டது.

புதுச்சேரிக்கு இக்பால் சிங்..

புதுச்சேரி யூனியன் பிரதேசத்தின் துணை நிலை ஆளுநராக இக்பால் சிங் நியமிக்கப்பட்டுள்ளார். இவர் மூத்த காங்கிரஸ் தலைவர் ஆவார்.

அதன்படி உத்தரகாண்ட் மாநில ஆளுநராக இருந்து வந்த பி.எல்.ஜோஷி, உ.பி. மாநில ஆளுநராக மாற்றப்பட்டார்.

உ.பி. மாநில ஆளுநராக இருந்து வந்த டி.வி.ராஜேஷ்வர் பதவியிலிருந்து ஓய்வு பெற்றார்.

உத்தரகாண்டுக்கு ஆல்வா..

மூத்த காங்கிரஸ் தலைவர் மார்கரெட் ஆல்வா, உத்தரகாண்ட் மாநில ஆளுநராக அறிவிக்கப்பட்டுள்ளார்.

கர்நாடக மாநில சட்டசபைத் தேர்தலின்போது காங்கிரஸ் தலைவர்கள் பணம் வாங்கிக் கொண்டு சீட் தந்தார்கள் என்று கூறி பெரும் பரபரப்பை ஏற்படுத்தியவர் மார்கரெட் ஆல்வா. அவருக்கு தற்போது ஆளுநர் பதவியைக் கொடுத்துள்ளனர்.

முன்னாள் மத்திய அமைச்சர் ஜெகன்னாத் பஹாடியா ஹரியானா மாநில ஆளுநராக நியமிக்கப்பட்டுள்ளார். இவரும் மூத்த காங்கிரஸ் தலைவர்தான். தற்போது அப்பொறுப்பில் உள்ள ஏ.ஆர்.கித்வாய் பதவியிலிருந்து ஓய்வு பெறுகிறார்.

ஜார்க்கண்ட் மாநில ஆளுநர் சையத் சிப்தே ரஸி, அஸ்ஸாம் மாநில ஆளுநராக மாற்றப்பட்டுள்ளார். இவர் வரும் டிசம்பர் மாதம் வரை இப்பதவியில் இருப்பார். பின்னர் ஓய்வு பெறுவார்.

ஜார்க்கண்ட் ஆளுநராக தற்போது நாகாலாந்து மாநில ஆளுநராக உள்ள சங்கரநாராயணன் நியமிக்கப்பட்டுள்ளார்.

குஜராத்துக்கு தேவேந்திர நாத் திவிவேதி...

குஜராத் மாநில ஆளுநர் நவல் கிஷோர் சர்மா பதவியிலிருந்து ஓய்வு பெறுவதால், அவருக்குப் பதில் தேவேந்திர நாத் திவிவேதி நியமிக்கப்பட்டுள்ளார்.