நாராயணமூர்த்தி மகள் அக்ஷதாவுக்கு திருமணம்!

பெங்களூர்: ரூ.1600 கோடி சொத்துக்கு சொந்தக்காரரான இளம் பெண் அக்ஷதாவுக்கு விரைவில் திருமணம் நடக்கவிருக்கிறது.

யார் இந்த அக்ஷதா?..

இந்திய ஐடி துறையில் புதிய புரட்சியை ஏற்படுத்திய இன்போஸிஸ் நாராயணமூர்த்தி, சுதா மூர்த்தி தம்பதிகளின் மூத்த மகள்தான் அக்ஷதா மூர்த்தி.

தற்போது பெங்களூரில் படித்த இவர் இப்போது இருப்பது கலிபோர்னியாவில். சைட்ரியன் வென்சர்ஸ் எனும் பெயரில் இயங்கும் ஆரம்ப முதலீட்டு நிறுவனத்தில் மூத்த அதிகாரியாக உள்ளார். சர்வதேச அளவில் தரமான டெக்னாலஜி தொடர்புடைய நிறுவனங்களுக்கு உதவுவதுதான் இந்த நிறுவனத்தின் நோக்கமாகும். மேலும் டென்ட்ரிஸ் நிறுவனத்தின் மார்க்கெட்டிங் பிரிவு இயக்குநராகவும் செயல்படுகிறார்.

இன்போஸிஸ் நிறுவனத்தில் இவருக்கு உள்ள பங்கு மட்டும் 1.41 சதவீதம். இந்த நிறுவனத்தில் அதிக பங்கு வைத்திருப்பவர்களில் அக்ஷதாவும் ஒருவர். இந்திய அளவில் அதிக சொத்துக்கு அதிபதியாக உள்ள பெண்களில் இவரும் ஒருவராம்.

ஆங்கிலம், கன்னடா, தமிழ் உள்ளிட்ட நான்கு மொழிகளை நன்கு எழுதப் பேசத் தெரிந்த அக்ஷதா, தனது பழைய கல்லூரித் தோழரையே மணக்கிறார். ஆகஸ்ட் மாதம் பெங்களூரில் நடக்கிறது இந்தத் திருமணம். மற்ற விவரங்களை விரைவில் அறிவிப்பதாக சுதா மூர்த்தி தெரிவித்துள்ளார்.