பணவீக்கம் மேலும் சரிவு!

டெல்லி: இந்தியாவின் பணவீக்க விகிதம் மேலும் சரிந்து மைனஸ் -1.54 ஆகிவிட்டது.

அதே நேரம் உணவுப் பொருட்கள், காய்கறிகள், பருப்பு மற்றும் பழ வகைகள் கடுமையான விலை உயர்வைச் சந்தித்துள்ளன.

ஜூலை 11 -ம் தேதியோடு முடிவடைந்த வாரத்தில் பணவீக்கம் -1.17 ஆக இருந்தது. ஆனால் கடந்த ஜூலை 18-ம் தேதியோடு முடிந்த வாரத்துக்கான மொத்த விலைக் குறியீட்டெண் கணக்குப்படி இதில் மேலும் சரிவு ஏற்பட்டு -1.54 சதவிகிதமாகிவிட்டது பணவீக்கம்.

இந்த வாரத்தில் கனிமத் துறைப் பொருட்களில் 16.8 சதவிகித வீழ்ச்சி காணப்பட்டாலும், அத்தியாவசியப் பொருட்களின் விலையில் 3 சதவிகித தொடர் உயர்வு காணப்படுகிறது.

விமான எரிபொருளுக்கான விலை கடந்த வாரம் 7 சதவிகிதம் குறைந்து காணப்பட்டது.

இந்திய பணவீக்கம் தொடர்ந்து இரண்டாவது மாதமாக மைனஸில் இருப்பது குறிப்பிடத்தக்கது.