கூகுள் சிஇஓ ஆப்பிள் நிர்வாகத்திலிருந்து விலகல்!

நியூயார்க்: கூகுள் நிறுவனத்தின் சிஇஓ எரிக் ஷ்மிட் ஆப்பிள் நிர்வாகத்திலிருந்து இன்று விலகினார். ஆப்பிள் நிர்வாகக் கூட்டங்களில் அவரால் தொடர்ந்து பங்கெடுக்க முடியாததால் விலகியதாக இதற்குக் காரணம் கூறப்படுகிறது.

2006-ம் ஆண்டு அவர் ஆப்பிள் நிர்வாகக் குழுவில் இயக்குநராக இணைந்தார்.

கூகுள், ஆப்பிள் இரண்டு -நிறுவனங்களுமே பெரிய அளவில் வளர்ச்சி பெற்று வரும் நிலையில், இரு நிர்வாகங்களிலுமே இயக்குநர் குழுக் கூட்டங்கள் அதிகரித்துள்ளன. இதனால் ஆப்பிள் நிறுவன இயக்குநர் குழுக் கூட்டங்களில் எரிக்கால் தொடர்ந்து பங்கேற்க முடியவில்லை.

எனவே அவர் தன்னை ஆப்பிள் இயக்குநர் பொறுப்பிலிருந்து விடுவித்துக் கொண்டுள்ளார் என ஆப்பிள் நிறுவனம் இன்று அறிவித்துள்ளது.

இந்த முடிவை இரு நிறுவனங்களும் இணைந்தே எடுத்துள்ளதாகக் கூறப்பட்டுள்ளது.