இளையாங்குடி தேர்தலை எதிர்த்த மனு தள்ளுபடி

சென்னை: இளையாங்குடியில் இடைத் தேர்தலை நடத்த தடை விதிக்கக் கோரி தொடரப்பட்ட வழக்கை சென்னை உயர்நீதிமன்றம் தள்ளுபடி செய்துவிட்டது.

இதுதொடர்பாக மக்கள் மாநாட்டுக் கட்சி என்ற கட்சியின் மாநிலச் செயலாளர் சதீஷ்குமார் என்பவர் நேற்று ஒரு மனுவைத் தாக்கல் செய்தார்.

அதில், எங்களது கட்சியைச் சேர்ந்த கலைமணி இளையாங்குடியில் போட்டியிட வேட்பு மனு தாக்கல் செய்திருந்தார்.

வேட்பு மனு பரிசீலனையின்போது கலைமணி மருத்துவமனையில் இருந்ததால் அருள்மொழி என்பவரை அனுப்பி வைத்திருந்தார்.

மனு பரிசீலனையின்போது, முன்மொழிந்தவரின் வாக்காளர் பட்டியல் எண் மாறியிருப்பதாக கூறி மனுவைத் தள்ளுபடி செய்துள்ளனர். ஆனால் வாக்காளர் பட்டியலில் பெயர் இருந்தாலே போதும் என்பதே விதி. ஆனால் இதைக் கேளாமல் தேர்தல் அதிகாரி கலைமணியின் மனுவைத் தள்ளுபடி செய்து விட்டார்.

ஆனால் இதே காரணத்தைக் காட்டி தள்ளுபடி செய்யப்பட்ட பர்கூர் தேமுதிக வேட்பாளர் சந்திரன், ஸ்ரீவைகுண்டம் சுயேச்சை வேட்பாளர் ஆகியோரின் மனுக்கள் பின்னர் ஏற்கப்பட்டுள்ளன.

இதுகுறித்து நாங்கள் தேர்தல் ஆணையத்தில் முறையிட்டும் பலன் இல்லை.

எனவே எங்களது வேட்பாளரின் பெயரை வேட்பாளர் பட்டியலில் இடம் பெறச் செய்ய உத்தரடவட வேண்டும். அதுவரை தேர்தலை நிறுத்தி வைக்க உத்தரவிட வேண்டும் என்று கூறப்பட்டிருந்தது.

இந்த மனு நேற்று நீதிபதி சுகுணா முன்பு விசாரணைக்கு வந்தது. மனுவைப் பரிசீலித்த நீதிபதி, இன்று விசாரிப்பதாக அறிவித்தார்.

இன்று தீர்ப்பளித்த நீதிபதி, இடைத் தேர்தலுக்கு தடை விதிக்க எந்த முகாந்திரமும் இல்லை என்று கூறி மனுவை தள்ளுபடி செய்தார்.