செப்டம்பர் முதல் ஏர் இந்தியாவின் 54 குறைந்த கட்டண விமானங்கள்!

டெல்லி: ஏர் இந்தியா எக்ஸ்பிரஸ் எனும் பெயரில் தனது குறைந்த கட்டண விமானங்களை சர்வதேச வழித்தடங்களிலும் இயக்கத் தயாராகிவிட்டது ஏர் இந்தியா நிறுவனம். வரும் செப்டம்பரிலிருந்து நாளொன்றுக்கு 54 விமானங்களை குறைந்த கட்டணத்தில் இயக்குகிறது. இத்தகவலை ஏர் இந்தியா சேர்மன் அரவிந்த் ஜாதவ் தெரிவித்தார்.

ஏர் இந்தியா நாளொன்றுக்கு மொத்தம் 300 விமானங்களை இயக்கி வருகிறது.

இவற்றில் 54 விமானங்களை குறைந்த கட்டண சேவையின் கீழ் இயக்க முடிவு செய்துள்ளது. ஆனால் எதிர்காலத்தில் நாளொன்றுக்கு 150 விமானங்களை குறைந்த கட்டணத்தில் இயக்கப் போவதாக அர்விந்த் ஜாதவ் தெரிவித்தார்.

மேலும் அடுத்த மூன்று ஆண்டுகளுக்குள் ஏர் இந்தியாவின் நஷ்டம் முழுவதையும் சரிக்கட்டி விடுவோம் என்றும், தற்போது இந்நிறுவனத்தின் கீழ் இயங்கும் தரைக் கட்டுப்பாடு, பொறியியல் பிரிவு, கார்கோ மற்றும் விமான பயிற்சி போன்றவற்றை துணை நிறுவனங்களாக அல்லது கூட்டு நிறுவனங்களாக மாற்றிவிடவும் ஏர் இந்தியா திட்டமிட்டுள்ளது.

மேலும் ஏர் இந்தியாவை தூக்கி நிறுத்த உடனடியாக ரூ.11000 கோடிக்கு நிதியுதவியை வழங்க வேண்டும் என்றும் அரவிந்த் ஜாதவ் கேட்டுக் கொண்டார்.