கச்சா எண்ணெய் 66 டாலராக சரிந்தது!

லண்டன்: கடந்த இரண்டு வாரங்களில் மீண்டும் குறைந்தபட்ச விலை அளவை எட்டியுள்ளது கச்சா எண்ணெய். பேரலுக்கு 74 டாலர் வரை விற்பனையாகி வந்த கச்சா எண்ணெய், இப்போது 65.87 டாலராகக் குறைந்துவிட்டது.

ஜூலை மாத இறுதிக்குப் பிறகு இந்த அளவு குறைந்த விலையை கச்சா எண்ணெய் தொட்டிருப்பது இதுவே முதல் முறை.

இந்த நிலை மேலும் தொடரும் என்றும் அவ்வப்போது லேசான உயர்வை எட்டும் என்றும் ஆஸ்திரேலிய நேஷனல் வங்கி அறிவித்துள்ளது.

உலகப் பொருளாதாரம் வீழ்ச்சியிலிருந்து மீளத் தொடங்கிவிட்டதாக பல நாடுகள் அறிவித்துவந்தாலும், அதை உடனடியாக நம்ப மக்கள் தயாராக இல்லை. எனவே தங்கள் முதலீடுகளை விலக்கிக் கொள்ள ஆரம்பித்துள்ளனர். இதனால் இன்றைய பங்கு வர்த்தகம் உலக அளவில் சரிந்துள்ளது.

எனவே கச்சா எண்ணெய் விலை மேலும் சரியக் கூடும் எனத் தெரிகிறது.