சோனியாவுடன் மு.க.ஸ்டாலின் சந்திப்பு

டெல்லி: டெல்லி சென்றுள்ள துணை முதல்வர் மு.க.ஸ்டாலின் காங்கிரஸ் தலைவர் சோனியா காந்தியை சந்தித்துப் பேசினார். துணை முதல்வரான பின் சோனியாவை அவர் சந்திப்பது இதுவே முதல் முறையாகும்.

டெல்லியில் உள்நாட்டுப் பாதுகாப்பு தொடர்பான மாநாடு பிரதமர் மன்மோகன் சிங் தலைமையில் இன்று நடந்தது. இதில் அனைத்து மாநில முதல்வர்களும் பங்கேற்றனர்.

தமிழக முதல்வர் கருணாநிதிக்குப் பதில் துணை முதல்வரான ஸ்டாலின் இம் மாநாட்டில் கலந்து கொண்டார்.

மாநாட்டில் பங்கேற்ற பின் சோனியாவை அவரது இல்லத்தில் ஸ்டாலின் சந்தித்துப் பேசினார். அவருடன் மத்திய அமைச்சர் தயாநிதி மாறனும் சென்றார்.

பின்னர் நிருபர்களிடம் பேசிய ஸ்டாலின்,

காங்கிரஸ் தலைவர் சோனியாவை மரியாதை நிமித்தமாக சந்தித்தேன். அவர் முதல்வர் கருணாநிதியின் உடல் நலம் குறித்து சோனியா கேட்டறிந்தார்.

தமிழக அரசியல் நிலவரம் குறித்தும் விவாதித்தோம். பிரதமரையும் தனியாக சந்தித்து பேச இருக்கிறேன் என்றார்.