வாஜ்பாயை சந்தித்தார் ஜஸ்வந்த் சிங் - பாஜக அதிர்ச்சி

டெல்லி: பாஜகவிலிருந்து நீக்கப்பட்ட ஜஸ்வந்த் சிங் இன்று முன்னாள் பிரதமரும், பாஜக மூத்த தலைவருமான வாஜ்பாயை சந்தித்துப் பேசினார். பாஜகவிலிருந்து நீக்கப்பட்ட சிங்கை, வாஜ்பாய் சந்திக்க அனுமதித்தது, பாஜக வட்டாரத்தில் அதிர்ச்சியை ஏற்படுத்தியுள்ளது.

கடந்த சில நாட்களாகவே பாஜக முகாம் கலகலத்துப் போய்க் கிடக்கிறது. இந்த நிலையில் இன்று பாஜக தலைமைக்கு புது அதிர்ச்சி காத்திருந்தது.

பாஜகவிலிருந்து சில நாட்களுக்கு முன்பு நீக்கப்பட்ட ஜஸ்வந்த் சிங், இன்று திடீரென வாஜ்பாயை சந்தித்துப் பேசினார். இதை பாஜக தலைவர்கள் எதிர்பார்க்கவில்லை.

கட்சியிலிருந்து நீக்கப்பட்ட ஜஸ்வந்த் சிங்கை சந்திக்க வாஜ்பாய் அனுமதி அளித்தது அவர்களை சங்கடப்படுத்தியுள்ளது. மேலும், ஜஸ்வந்த் நீக்கத்தை வாஜ்பாய் அங்கீகரிக்கவில்லையோ என்ற சந்தேகத்தையும் அரசியல் வட்டாரத்தில் எழுப்பியுள்ளது.

வாஜ்பாய் கடந்த சில ஆண்டுகளாகவே தீவிர அரசியலி்ல் ஈடுபடாமல் ஒதுங்கியுள்ளார். இருப்பினும் பாஜகவினர் மத்தியில் இன்னும் அவர் உயரிய இடத்தில் வைக்கப்பட்டுள்ளார்.

இந்த நிலையில் ஜஸ்வந்த் சிங்கை வாஜ்பாய் சந்தித்தது கட்சியினர் மத்தியில் அதிர்ச்சிகளை ஏற்படுத்தியுள்ளது. மேலும், ஜஸ்வந்த் நீக்கம் தொடர்பாக கட்சியின் நிலையில் மாற்றம் ஏற்படுமோ என்ற எதிர்பார்ப்பும் எழுந்துள்ளது.