தூத்துக்குடி அதிமுக விவசாய அணி செயலர் திமுகவிற்கு தாவல்

தூத்துக்குடி: தூத்துக்குடி மாவட்ட அதிமுக பிரமுகர் காசியானந்தம் அக்கட்சியிலிருந்து விலகி முன்னாள் அமைச்சர் அனிதா ராதாகிருஷ்ணன் முன்னிலையில் திமுகவில் இணைந்தார்.

அனிதா ராதாகிருஷணன் சமீபத்தில்தான் திமுகவுக்குத் தாவியர் என்பது குறிப்பிடத்தக்கது.

தூத்துக்குடி மாவட்டம் கொம்மடிக்கோட்டையை சேர்ந்தவர் காசியானந்தம். இவர் தூத்துக்குடி மாவட்ட அதிமுக விவசாய அணி இணைச் செயலாளராக உள்ளார்.

இவர் கடந்த 1986ம் ஆண்டு சாத்தான்குளம் யூனியன் சேர்மன் தேர்தலிலும், கடந்த 1996 ம் ஆண்டு சாத்தான்குளம் சட்டசபை தேர்தலிலும் போட்டியிட்டுள்ளார்.

இந்த நிலையில் அதிமுகவில் இருந்து விலகி முன்னாள் அமைச்சர் அனிதா ராதாகிருஷ்ணனை சந்தித்து திமுகவில் இணைந்தார்.

சாத்தான்குளம் பகுதி அதிமுக முக்கிய பிரமுகரான காசியானந்தம் விலகியிருப்பது அதிமுக தொண்டர்களிடையே அதிர்ச்சியை ஏற்படுத்தியுள்ளது.

இவரை தொடர்ந்து மேலும் சில முக்கிய புள்ளிகள் திமுகவில் இணையவிருப்பதாகவும் கூறப்படுகிறது.