ஜம்முவில் லஷ்கர் தளபதி சுட்டு கொலை

ஜம்மு: ஜம்மு காஷ்மீரில் இன்று காலை பாதுகாப்பு படையினர் நடத்திய அதிரடி தாக்குதலில் லஷ்கர்-இ-தெய்பா இயக்க தளபதி ஒருவன் சுட்டு கொல்லப்பட்டான்.

ஜம்முவில் இருந்து சுமார் 150 கிமீ தூரத்தில் உள்ளது ரியசி ஜம்மாலன் காட்டு பகுதி. இந்த பகுதியில் லஷ்கர் தீவிரவாத இயக்கத்தின் நடமாட்டம் அதிகமிருப்பதாக எல்லை பாதுகாப்பு படையினருக்கு தகவல் கிடைத்தது.

இந்நிலையில் இன்று காலை பாதுகாப்பு படையினர் அப்பகுதிக்கு விரைந்தனர். அவர்களுக்கும், தீவிரவாதிகளுக்கும் இடையே துப்பாக்கிச் சண்டை வெடித்தது.

இந்த சண்டையில் லஷ்கர் தீவிரவாத தளபதி அபு ஜின்டால் என்பவர் சுட்டு கொல்லப்பட்டார். இவர் பாகிஸ்தானை சேர்ந்தவர்.

அப்பகுதியில் மேலும் இரண்டு தீவிரவாதிகள் இருக்கலாம் என கருதப்படுவதால் பாதுகாப்பு படையினர் தொடர்ந்து தேடுதல் வேட்டையில் ஈடுபட்டு வருகின்றனர்.