டிசம்பரில் தமிழக பாஜக தலைவர் தேர்தல்

நாகர்கோவில்: தமிழக பாஜக கட்சி தேர்தல் வரும் டிசம்பர் மாதம் தேர்தல் நடைபெறும் என அக்கட்சியின் தமிழக தலைவர் இல. கணேசன் தெரிவித்துள்ளார்.

நாகர்கோவிலில் நிருபர்களிடம் அவர் கூறுகையில்,

நாடு கடும் பொருளாதர நெருக்கடியில் சிக்கியுள்ளது. சிக்கன நடவடிக்கை என்ற பெயரில், மத்திய அரசு அறிவித்த பல்வேறு அறிவிப்புகளால் எந்தப் பயனும் ஏற்படவில்லை.

விடுமுறை நாட்களில் மத்திய, மாநில அரசுகளின் வாகனங்கள் ஓடுவதை கட்டுப்படுத்தினாலே பணத்தை கோடிக்கணக்கில் மிச்சப்படுத்த முடியும்.

பாஜகவில், செப்டம்பர் 25ம் தேதி வரை உறுப்பினர் சேர்க்கை நடைபெற உள்ளது. அதன் பின்பு, கிளை பதவிகளுக்கு துவங்கி நகர, ஒன்றியங்களுக்கு தேர்தல்கள் நடைபெறும்.

டிசம்பர் மாதம் மாநிலத் தலைவர் மற்றும் நிர்வாகிகளுக்கான தேர்தல் நடைபெறும்.

தமிழக மீனவர்களை இலங்கை கடற்படையினர் தாக்குவதை கண்டித்து ராமேஸ்வரத்தில் வரும் 6ம் தேதியும், எட்டு அம்ச கோரிக்கைகளை வலியுறுத்தி, சென்னையில் வரும் 8ம் தேதியும் ஆர்ப்பாட்டம் நடைபெறும்.

நதிநீர் பிரச்னை தொடர்பாக ராகுல் தெரிவித்த கருத்துக்களை பாஜக கண்டிக்கிறது என்றார்.