ஒபாமா கொல்லப்பட வேண்டுமா? - பேஸ்புக்கில் சர்வே!!!

வாஷிங்டன்: அமெரிக்க அதிபர் பாரக் ஒபாமா கொல்லப்பட வேண்டும் என நினைக்கிறீர்களா என்று கேட்டு பேஸ்புக்கில் ஒரு சர்வே இடம் பெற்றது. இதுகுறித்து அமெரிக்காவின் சிஐஏ விசாரணையில் இறங்கியுள்ளது.

திங்கள்கிழமை பேஸ்புக்கில் இந்த சர்வே இடம் பெற்றது. இருப்பினும் இதுகுறித்து பேஸ்புக் நிர்வாகிகளுக்கு தகவல் போனவுடன் உடனடியாக அதை தூக்கி விட்டனர்.

பேஸ்புக்கில் இடம் பெற்ற இந்த திடுக்கிடும் சர்வே குறித்து அமெரிக்காவின் உளவுப் பிரிவினர் தீவிர விசாரணையில் இறங்கியுள்ளனர்.

பாரக் ஒபாமாவுக்கு ஏகப்பட்ட கொலை மிரட்டல்கள் உள்ளதால், இந்த சர்வேயை சாதாரணமாக எடுத்துக் கொள்ள விரும்பவில்லை என்று அமெரிக்கா தெரிவித்துள்ளது.

பேஸ்புக்கில் இடம் பெற்ற அந்த சர்வேயில், ஒபாமா கொல்லப்பட வேண்டுமா என்ற கேள்வியைக் கேட்டு பதிலாக, இல்லை, இருக்கலாம், ஆமாம், ஆமாம் ஆனால் எனது சுகாதார இன்சூரன்ஸ் திட்டங்களை ரத்து செய்தால் என்று கொடுக்கப்பட்டிருந்தது.

இந்த கேள்வியை பேஸ்புக் உருவாக்கவில்லை என்றும், யாரோ தனி நபர்தான் இவ்வாறு செய்துள்ளார் என்றும் பேஸ்புக் விளக்கம் அளித்துள்ளது.