18,000 எச்1பி விசாக்களை வாங்க ஆள் இல்லை

வாஷிங்டன்: அமெரிக்காவின் வேலைவாய்ப்புச் சந்தை தொடர்ந்து நலிவடைந்த நிலையில் இருப்பதைப் பிரதிபலிக்கும் வகையில் இன்னும் 18 ஆயிரத்திற்கும் மேற்பட்ட எச்1பி விசாக்கள் வாங்க ஆள் இல்லாமல் காத்துக் கிடக்கிறதாம்.

அமெரிக்க நாடாளுமன்றம் வேலைச் சந்தை மீது விதித்துள்ள கடுமையான கட்டுப்பாடுகளே இந்த நிலைக்குக் காரணம் என்று கூறப்படுகிறது. இதன் காரணமாக ஒரு காலத்தில் கிடைக்காதா என்று எல்லோரையும் ஏக்கப் பெருமூச்சு விட வைத்த எச்1பி விசாவை, ஏறெடுத்துப் பார்க்கவும் இப்போது ஆள் இல்லாத நிலை ஏற்பட்டுள்ளது.

அமெரிக்க குடியுரிமை மற்றும் இமிகிரேஷன் சேவை அமைப்பு வெளியிட்டுள்ள புதிய தகவலின்படி, பொதுப் பிரிவில் 46,700 எச்1பி விசாக்கள் செப்டம்பர் 25ம் தேதி வரை பூர்த்தி செய்யப்பட்டுள்ளன. ஆனால் அமெரிக்க நாடாளுமன்றம் நிர்ணயித்த விசாக்களின் எண்ணிக்கை 65,000 ஆகும். அதாவது 18 ஆயிரத்திற்கும் மேற்பட்ட விசாக்கள் இன்னும் யாராலும் பெறப்படாமல் உள்ளது.

முக்கியமாக, கம்ப்யூட்டர் மற்றும் தகவல் தொழில்நுட்பப் பிரிவில் பணியாற்றுவோருக்கான விசாதான் எச்1பி விசா. கடந்த காலங்களில் இந்த விசாவுக்கு பெரும் கிராக்கி இருந்தது. ஆனால் தற்போது நிலைமை தலைகீழாக மாறியுள்ளது.

கடந்த பல ஆண்டுகளில் இப்போதுதான் முதல் முறையாக எச்1பி விசாவைப் பெற ஆள் பற்றாக்குறை ஏற்பட்டுள்ளதாம்.

கடந்த காலங்களில் 65 ஆயிரம் விசாக்களும் ஒரே நாளில் காலியாகி விடும் என்பது குறிப்பிடத்தக்கது.