நோபல் வென்ற வெங்கட்ராமன் ராமகிருஷ்ணனுக்கு பிரதமர் வாழ்த்து

டெல்லி: நோபல் பரிசைப் பெற்று இந்தியாவுக்கும் பெருமை சேர்த்துள்ள தமிழர் வெங்கட்ராமன் ராமகிருஷ்ணனுக்கு பிரதமர் மன்மோகன் சிங் வாழ்த்து தெரிவித்துள்ளார். இந்தியாவின் மாபெரும் பெருமை வெங்கி என்று அவர் புகழாரம் சூட்டியுள்ளார்.

இந்தியாவின் கல்வி முறைக்கு செலுத்தப்பட்ட மாபெரும் அஞ்சலி என்றும் அவர் பாராட்டியுள்ளார்.

இதுகுறித்து வெங்கிக்கு பிரதமர் அனுப்பியுள்ள வாழ்த்துச் செய்தியில், ஒரு மாபெரும் விஞ்ஞானிக்கு சர்வதேச அளவில் மிகப் பெரிய அங்கீகாரம் கிடைத்திருப்பது ஒவ்வொரு இந்தியருக்கும் பெருமை சேர்ப்பதாக அமைந்துள்ளது.

இந்தியாவின் கல்வி முறைக்குக் கிடைத்துள்ள மிகப் பெரிய அஞ்சலி இது. ஆசிரியர் சமுதாயத்தின் மாபெரும் சேவைக்குக் கிடைத்துள்ள பாராட்டு இது. வெங்கட்ராமன் ராமகிருஷ்ணனைப் போன்ற மாபெரும் சாதனையாளர்களை உருவாக்கக் கூடிய தகுதியும், திறமையும் நம்மிடம் உள்ளது என்பதை இந்த விருது பறை சாற்றுகிறது என்று கூறியுள்ளார் பிரதமர்.

கருணாநிதி வாழ்த்து..

இதேபோல முதல்வர் கருணாநிதியும் வெங்கட்ராமன் ராமகிருஷ்ணனுக்கு வாழ்த்தும், பாராட்டும் தெரிவித்துள்ளார்.