தமிழக உள்ளாட்சி இடைத் தேர்தலில் 69% வாக்குகள் பதிவு
சென்னை: தமிழகத்தில் நேற்று நடந்த உள்ளாட்சி இடைத் தேர்தலில் 69 சதவீத வாக்குகள் பதிவாகியிருப்பதாக தமிழக தேர்தல் ஆணையம் தெரிவித்துள்ளது.
மொத்தம் 603 பதவி இடங்களுக்கு தேர்தல் அறிவிக்கப்பட்டது. இவற்றில் 74 பதவி இடங்களுக்கு வேட்புமனு தாக்கல் செய்யப்படவில்லை. ஊரக உள்ளாட்சிகளில் 274 பதவியிடங்களுக்கும், நகர்ப்புற உள்ளாட்சிகளில் 6 பதவி இடங்களுக்கும் சேர்த்து 280 பதவி இடங்களுக்கு வேட்பாளர்கள் போட்டியின்றி தேர்வு செய்யப்பட்டனர்.
மீதமுள்ள பகுதிகளுக்கு நேற்று இடைத் தேர்தல் நடந்தது.
இந்தத் தேர்தலில் மொத்தம் 69 சதவீத வாக்குகள் பதிவாகின. அவற்றில் 66 சதவீதம் ஆண்களும், 71 சதவீதம் பெண்களும் வாக்களித்துள்ளனர்.
ஊரக உள்ளாட்சிகளில் 68 சதவீதமும், நகர்ப்புற உள்ளாட்சிகளில் 70 சதவீதமும் ஓட்டுகள் பதிவாகியுள்ளன.
இந்தத் தகவலை மாநில தேர்தல் ஆணையம் வெளியிட்டு உள்ளது.
நாளை வாக்கு எண்ணிக்கை நடைபெறுகிறது.