அக். 14ல் வெள்ளை மாளிகையில் ஒபாமா தீபாவளி கொண்டாட்டம்

வாஷிங்டன்: அமெரிக்க வரலாற்றிலேயே முதல் முறையாக வெள்ளை மாளிகையில், வருகிற 14ம் தேதி அதிபர் பாரக் ஒபாமா தனது அதிகாரிகளுடன் தீபாவளிக் கொண்டாட்டத்தில் ஈடுபடுகிறார்.

அமெரிக்க அதிபராக புஷ் இருந்தபோது தீபாவளிக் கொண்டாட்டத்தை அதிபர் மாளிகையில் அறிமுகப்படுத்தி வைத்தார். இருப்பினும் அவர் நேரடியாக தீபாவளிக் கொண்டாட்ட நிகழ்ச்சிகளில் பங்கேற்றதில்லை. மேலும், வெள்ளை மாளிகைக்கு அருகில் உள்ள கட்டடத்தில்தான் தீபாவளிக் கொண்டாட்டம் நடைபெறுவது வழக்கம்.

ஆனால் இந்த வழக்கத்தை தற்போது மாற்றியுள்ளார் அதிபர் ஒபாமா. முதல் முறையாக வெள்ளை மாளிகையின் கிழக்கு அறையில் தீபாவளிக் கொண்டாட்டங்கள் நடைபெறும், அதில் அதிபர் பங்கேற்பார் என்று வெள்ளை மாளிகை அலுவலகம் அதிகாரப்பூர்வமாக அறிவித்துள்ளது.

இந்திய சமுதாயத்தினருடன் இணைந்து தீபாவளிக் கொண்டாட்டத்தில் அக்டோபர் 14ம் தேதி ஈடுபடுகிறார் ஒபாமா.

மேலும் அன்றைய தினம், ஆசிய-அமெரிக்கர்கள் மற்றும் பசிபிக் தீவு சமுதாயத்தினரின் பிரச்சினைகளைத் தீர்ப்பது தொடர்பான வெள்ளை மாளிகை ஆலோசனைக் கமிஷனை மீண்டும் செயல்படுத்துவது தொடர்பான உத்தரவிலும் ஒபாமா கையெழுத்துப் போடவுள்ளார்.