வாசிம் அக்ரம் மனைவி ஹூமா உடல் அடக்கம்
ஹூமாவுக்கு வயது 42. இரு குழந்தைகளுக்கு தாயான அவர், உடல் நலக்குறைவு காரணமாக, விமான ஆம்புலன்ஸில் சிங்கப்பூருக்கு கொண்டு செல்லப்பட்டபோது உடல் நலம் மிகவும் மோசமடைந்தது.
இதையடுத்து விமானத்தை சென்னையில் இறக்கி அப்பல்லோ மருத்துவமனையில் சேர்த்தனர். அங்கு தீவிர சிகிச்சை அளித்தும் பலனின்றி நினைவு திரும்பாத நிலையிலேயே ஹூமா மரணமடைந்தார்.
இதையடுத்து அவரது உடல் பதப்படுத்தப்பட்டு டெல்லிக்கு தனி விமானம் மூலம் கொண்டு செல்லப்பட்டது. அங்கிருந்து பாகிஸ்தான் ஏர்லைன்ஸ் விமானம் மூலம் லாகூர் கொண்டு செல்லப்பட்டது.
பிந்னர் அங்கு ஹூமாவின் உடல் அடக்கம் நடந்தது. இதில் முன்னாள் கிரிக்கெட் வீரர்கள் சயீத் அன்வர், இன்சமாம் உல் ஹக், மொயின் கான், இஜாஸ் அகமது, ஜாகிர்கான், இஜாஸ் பட் உள்ளிட்ட பலரும், கிரிக்கெட் வாரிய நிர்வாகிகள், ஏராளமான ரசிகர்கள் கலந்து கொண்டனர்.
ஹூமாவும், வாசிம் அக்ரமும் ஒன்றாகப் படித்தவர்கள். 1986ம் ஆண்டு முதலே பழக்கமானவர்கள். 1993ல் திருமணம் நடந்தது. இருவருக்கும் இரு குழந்தைகள் உள்ளனர்.
சைக்கோதெரபிஸ்டாக இருந்தவர் ஹூமா. வாசிம் அக்ரம் கேப்டனாக இருந்தபோது பாகிஸ்தான் அணியின் மன நல ஆலோசகராக செயல்பட்டார்.