ஜெட் ஏர்வேஸ் நஷ்டம் ரூ 406.69 கோடி!

மும்பை: இந்த நிதியாண்டின் இரண்டாவது காலாண்டில் மட்டும் ரூ 406.69 கோடியை நஷ்டமாக சந்தித்துள்ளது ஜெட் ஏர்வேஸ்.

இந்த இழப்புக்குக் காரணம், பாதிக்கும் மேற்பட்ட ஜெட் ஏர்வேஸ் விமானங்கள் குறைந்த கட்டண சேவைக்கு மாற்றப்பட்டதுதான் என்று நிர்வாகம் சார்பில் தெரிவிக்கப்பட்டுள்ளது.

ஜெட் ஏர்வேஸின் மொத்த வருமானம் இந்தக் காலாண்டில் 26.9 சதவிகித வீழ்ச்சியைச் சந்தித்துள்ளது. கடந்த காலாண்டில் மொத்த வருமானம் ரூ 3258.45 கோடியாக இருந்தது. அது இப்போது 2380.97 கோடியாக வீழ்ச்சியடைந்துள்ளது.

உள்நாட்டு விமான சேவையைப் பொறுத்தவரை 43.2 சதவிகிதம் வீழ்ச்சி ஏற்பட்டு ரூ.831 கோடியாகக் குறைந்துள்ளது.
இதுதவிர, சமீபத்தில் ஜெட் ஏர்வேஸ் விமானிகள் மேற்கொண்ட ஸ்ட்ரைக்கால் ஏற்பட்ட நஷ்டம் மட்டுமே ரூ.80 கோடி.

இது தற்காலிக நிலைதான் என்றும், வரும் காலாண்டில் கணிசமான வளர்ச்சி ஏற்படும்; அதற்கான திட்டங்களை செயல்படுத்தத் துவங்கிவிட்டோம் என்றும் ஜெட் ஏர்வேஸ் செயல் இயக்குநர் சரோஜ் தத்தா தெரிவித்தார்.